Foto: Almaty ákimdigi
Almatynyń 35 joǵary oqý ornynda 236,1 myń stýdent oqidy. Stýdentterdiń eleýli bóligi elimizdiń basqa óńirlerinen kelgender jáne sheteldik azamattar. Bul týraly Almaty qalasy Jastar saiasaty basqarmasynyń ókilderi aitty, dep habarlaidy Ult.kz.
Qala óńirdegi eń iri bilim berý ortalyqtarynyń biri. Kópultty stýdenttik orta almatylyq joǵary oqý oryndaryna degen turaqty qyzyǵýshylyqty arttyryp, qalanyń bilim berý ekojúiesiniń halyqaralyq sipatyn kúsheitip otyr.
Aita keteiik, 2023 jyly Qazaqstanda 82 elden kelgen 26 myń sheteldik stýdent bilim alǵan. Bul eldegi stýdentterdiń jalpy sanynyń 4,4% - y (606 myń adam).
Sheteldik stýdentterdiń eleýli bóligi elimizdiń eń iri stýdenttik ortalyǵy sanalatyn Almatyǵa tiesili.
Sheteldik stýdentterdiń basym kópshiligi ál-Farabi atyndaǵy Qazaq ulttyq ýniversitetinde oqidy - 4,5 myń adam. Ekinshi orynda S. Asfendiiarov atyndaǵy Qazaq ulttyq meditsina ýniversiteti. Munda 1,9 myń sheteldik stýdent bilim alyp júr, onyń ishinde 1,2 myń adam (63,2%) úndi etnosynyń ókilderi.
Úzdik úshtik qatarynda Q. Sátbaev atyndaǵy Qazaq ulttyq tehnikalyq zertteý ýniversiteti bar. Atalǵan oqý ornynda Túrkimenstannan kelgen 1,9 myń sheteldik stýdent bilim alyp júr. Abai atyndaǵy Qazaq ulttyq pedagogikalyq ýniversitetinde 1,8 myń sheteldik stýdent oqidy.
«Sońǵy bir jyldyń ishinde sheteldik stýdentter sany 45%-dan astamǵa ósti (17,1 myńnan 22,6 myńǵa deiin, iaǵni 5,5 myńǵa artty). Bizdiń joǵary oqý oryndarynyń álemdik reitingterdegi ornyn nyǵaityp, halyqaralyq baǵdarlamalardy damytyp, joǵary sapaly zamanaýi bilim berý ortasyn qalyptastyryp jatqany biz úshin úlken maqtanysh. Bul álemniń túkpir-túkpirinen keletin stýdentterdiń qyzyǵýshylyǵyn oiatady», — dedi Almaty qalasy Jastar saiasaty basqarmasynyń basshysy Aziz Kajdenbek.
