4 jyl boiy májbúrli túrde tánin saýdalap, ózin "quldyqta boldym" dep jar salǵan boijetken "Birinshi Eýraziia" arnasyna eksliýzivti suhbat berdi. Aitýynsha, oǵan ortadaǵy jeńgetailar úi qyzmetshisi qyzmetin usynyp, bir kúnnen soń jezókshelikpen ainalysýǵa májbúrlegen.
Kúnine ákesindei onnan astam er-azamatpen tósektes bolǵan boijetken qarańǵy qapastan jyldar boiy qutyla almai álek bolǵanyn aitady. Ol qansha qashýǵa umtylǵanymen, ustalyp, odan eki ese artyq jumys isteýge májbúr bolǵanyn jetkizdi. Jantúrshigerlik azapty kúnderdi bastan keshirgen Raýshan Núsipova basynan ótkenin buqpasyz aityp berdi.
Tiliniń kemistigi bar boijetken tipti durys sóilei almaidy. Sózinshe mektepti arnaiy internatta bitirgen. 2014 jyly Uzynaǵashtan Almatyǵa qarai taksige otyrǵan oǵan kólik júrgizýshisi úi qyzmetshisi bolýdy usynǵan. Oǵan senip qalǵan qyz bir kúnnen-aq sorlap qalǵanyn aitady. Bir kún úi tazalaǵan ony ertesinde qonaqúige aryn satýǵa jibergen. Qarsylassa taiaqtyń astyna alǵan.
"Pyshaqpen de uratyn basymdy qanatyp. Jumys istei almai, on myń teńge aparǵan kezde qylǵyndyryp, baýyzdaimyn, únińdi shyǵarmai deitin. Eshkim seni qutqaryp almaidy dep qorqytty", - deidi Raýshan Núsipova.
Jeńgetailar ony on erkekke qyzmet kórsetýge májbúrlep, kúnine jiyrma myń teńge suraǵan.
Onyń aitýynsha, ózi siiaqty quldyqta júrgen taǵy on bes qyz bar.
"Qazaǵy da, qyrǵyzy da, ózbegi de bar. Qaraqalpaq ta bar. On bes shaqty qyz. 94-97 jylǵylar da bar. Kúnine plan qoiatyn. Jiyrmadan joǵary. Jiyrmadan tómen isteme deitin. Istemeseń, oqtaýmen taiaq jeisiń", - dep muńyn aitty ol.
Raýshan quldyqtan 20 sáýir kúni qashyp shyqqan eken. On kún dalada túnegen ony "Saiahat" bazarynyń mańynan jeńgetailardyń biri kórip qoiǵan eken. Qorlyqqa qaita barǵansha, kólik astyna túsken artyq degen boijetken bazarǵa qarai júgirgen. Dál osy jerde ony jeńgetaidan jeltoqsanshy Gúlbahram Júnis arashalap qalypty.
"Bilik bilmeidi degenge men senbeimin. Múmkin joǵary bilikke bul jetpeitin shyǵar. Tómengi bilik, Túrksib aýdanynyń jergilikti ákimshiliginiń, quqyqtyq organdardyń muny bilmeýi múmkin emes", - deidi jeltoqsanshy.
Mynaý Dýlatov, 17 kóshesindegi qonaq úi. Raýshan kúnde keshki altydan tańǵy altyǵa deiin onnan astam adamǵa dál osy ǵimarattyń ekinshi qabatynda qyzmet kórsetkenin aitady.
Ǵimarattyń birinshi qabaty kólik jóndeýshilerdiń enshisinde bolsa, ekinshi jáne úshinshi qabaty qonaq úi eken.
"Kúnde ákelip, alyp ketedi. Ataýy joq (red. - qyzdardy)", - deidi jergilikti turǵyndar.
Qazirgi tańda qyzdy óz qaramaǵyna alǵan eriktiler aýrýhana tabaldyryǵyn tozdyryp júr.
Eske salsaq, IID kúni keshe bul jaitqa qatysty resmi pikir bildirgen edi.
«N. esimdi azamattyń aryzy QR QK 308-baby boiynsha sotqa deiingi tergeýdiń biryńǵai reestrinde tirkeldi. Kúdiktiler qamaýǵa alynyp, IID-ne jetkizildi. Jedel jáne tergeý is-sharalary ótkizilip jatyr", - dedi politsiiadaǵylar.
