Almatyda Halyq ártisi Roza Baǵlanovanyń eskertkishi ashyldy, dep habarlaidy "Ult aqparat" ákimdiktiń baspasóz qyzmetine silteme jasap.
Qazaqstan Respýblikasynyń Halyq ártisi Roza Baǵlanovanyń 100 jyldyq mereitoiyn merekeleý aiasynda Almaty qalasynyń ákimi Erbolat Dosaevtyń, Qazaqstannyń Eńbek Eri, teatr jáne kino akteri Asanáli Áshimovtyń, Qazaqstannyń Eńbek Eri Álibek Dinishevtiń, Qazaqstannyń Halyq ártisi Altynbek Qorazbaevtyń, mádeniet qairatkeri Qýanysh Ábdiqalymovtyń, aqyn Aqqushtap Baqtygereevanyń, ánshiniń týǵandary men jaqyndary – uly Tájen men kelini Maral Baǵlanovtardyń qatysýymen áigili ánshi eskertkishiniń saltanatty ashylý rásimi ótti.
Biiktigi 4,8 metr qola eskertkish Medeý aýdanyndaǵy Jambyl atyndaǵy Qazaq memlekettik filarmoniiasy ǵimaratynyń aldyna ornatyldy. Opera ánshisi 1949-1960 jyldar aralyǵynda osy filarmoniia qabyrǵasynda óner kórsetken edi.
Qola jáne granitten jasalǵan eskertkishtiń avtorlary – músinshiler D.Aǵzamov, Ý.Aqjoltai, A.Jamhan, A.Qabyl.
Eskertkishti ashý rásimi barysynda Almaty qalasynyń ákimi Erbolat Dosaev Roza Baǵlanovanyń qazaq halyq mýzykasy men Qazaqstan kompozitorlarynyń shyǵarmashylyǵyn damytýǵa jáne nasihattaýǵa qosqan baǵa jetpes zor úlesin atap ótti.
«Bizdiń uly ánshimiz Roza Baǵlanovaǵa eskertkish ornatý – onyń murasyn qurmetteý jáne este saqtaý. Ol mýzyka óneriniń shyrqaý biigindegi jaryq juldyz boldy. Onyń erekshe daýysy men talanty bizdiń halqymyzdyń baǵa jetpes qundylyǵyna ainaldy. Ánshiniń súiikti qalasy – Almatyda 100 jyldyq mereitoi aiasynda Roza Baǵlanovanyń esimin máńgi este qaldyrý úshin eskertkish ornatqanymyzǵa sheksiz qýanyshtymyn», – dedi Erbolat Dosaev.
Sondai-aq, búgin Almatyda Roza Baǵlanovanyń 100 jyldyǵyna orai Respýblika Saraiynda «Aqmańdailym» atty merekelik kontsert ótti. Aty ańyzǵa ainalǵan ánshiniń repertýaryndaǵy ánderdi tanymal qazaqstandyq ártister oryndady.
