Almatyda psihologiialyq aýrýhanadan qashyp ketken úsh jasóspirim kesheden beri tabylmai jatyr, dep habarlaidy "Ult aqparat".
14 jastaǵy Margarita Kozlovany anasy dúisenbi kúni Abai men Seifýllin qiylysyndaǵy respýblikalyq psihologiialyq densaýlyq ortalyǵyna jatqyzǵan.
Anasy Faimanyń aitýynsha, qyzynyń kózine qos kórine bastaǵan.
«Sársenbi keshki 17:00 shamasynda 13, 16, 14 jastaǵy jasóspirimder aýrýhanadan qashyp ketken. Olardyń qashyp shyqqan sáti syrtqy baqylaý kameralaryna túsip qalǵan.
«Birden politsiiaǵa habar berildi. Býran ekipajy kelip, derekti tirkedi. Sodan beri úshinshi táýlikke ketip barady balalar tabylmady. Qasyndaǵy 13 jáne 16 jastaǵy bala men qyz buryn da qashyp úirengen dep estidim. Al meniń qyzym úiden shyqpaityn. Meniń oiymsha, ol ana eki balanyń yqpalymen ketti», - dedi Faima.
Margaritanyń ústinde jasyl jempir bolǵan. Shashy sary, aqsary qyz. Anasy kórgen adamdar bolsa, habarlasýlaryn ótindi.
Qalalyq IID baspasóz qyzmeti habarlaǵandai, qazir jasóspirimderdi izdestirýmen Almaly aýdandyq IID ainalysyp jatyr.
«Úsh patsient ketip qalǵan. Olardyń simtomatikasyna kelsek, olarda dromomaniia belgileri baiqalǵan. Bul úiden ketip qalý, kezbelikke beiimdilik degendi bildiredi. Qazir olardy bizdiń qyzmetkerler de, politsiia da izdestirip jatyr», - dedi Respýblikalyq ǵylymi-praktikalyq psihiatriialyq densaýlyq ortalyǵy bas direktorynyń orynbasary Qýanysh Altynbekov.
Ortalyqtyń meditsinalyq qyzmet sapasyn baqylaý bóliminiń basshysy Ajar Ábeevanyń aitýynsha, atalǵan derek boiynsha qazir ishki tekserý júrip jatyr.
«Bul jerde klinikalyq protokoldan negizsiz aýytqý deregi boldy ma álde qyzmetkerler mindetin durys atqarmady ma sol máseleler qaralady. Osy tártip buzýshylyqtar tirkelgen anyqtalǵan jaǵdaida sáikesinshe shara qabyldanady. Bul jaǵdaida ishki tártip buzylǵan. Meniń oiymsha, tárbieshiniń nazaryn ádeii basqaǵa buryp, urymtal tusty paidalanǵan jasóspirimder shyǵyp ketken. Balalardyń biri initsiator bolyp, qalǵany onyń artynan erip ketýi múmkin», - dedi Ajar Ábeeva.
