Almatyda podkast týraly alǵashqy kitaptyń tusaýkeseri ótti, dep habarlaidy "Ult aqparat".
Tájiribeli podkasterler Baqytgúl Salyhova men Áinel Ámirhan qalyń kópshilikke Alqa Publishing baspa úiimen birlese shyǵarǵan podkast salasy týraly qazaq tilindegi alǵashqy kitapty usyndy. Kitap «Atyń shyqpasa, podkast jasa: paidaly podkast jasaý sheberhanasy» dep atalady.
«Podkast - dúnie júzinde qarqyndy damyp kele jatqan salalardyń biri. Qazaqstan da bul kóshten qalyp jatqan joq. Ásirese, sońǵy birneshe jyl podkasterlerdiń qatary artyp keledi. Biraq ózim podkast salasyna 2019 jyly kelgende aqparatty tirnektep jinaýǵa týra kelgeni esimde. Kitaptar da tek aǵylshyn, orys tilderinde bolatyn. Osy olqylyqtyń ornyn toltyrý maqsatynda, ári salaǵa kelip jatqan mamandarǵa, qyzyǵýshylyq tanytqan adamdarǵa paidaly bolsyn degen nietpen Baqytgúl ekeýimizde osy kitapty jazý ideiasy týyndady», - deidi kitap avtorlarynyń biri, OY-DETOX podkastynyń júrgizýshisi Áinel Ámirhan.
«Kitap jazý barysynda «podkast» sózimen podkast emes nárselerdi ataý problemasyna keziktik. Suhbat, áńgime formatyndaǵy kóptegen YouTube jobalardy podkast dep ataý sánge ainaldy, biraq olar arnaiy podkast platformalarynda aýdio formatynda jariialanbaǵandyqtan, podkast bola almaidy. Jańa sózderge, terminderge muqiiat bolyp, maǵynasyn túsinip, ózin de, ózgelerdi de shatystyrmaý mańyzdy. Osy rette, kitabymyz podkast bastap ketýińizge kómek berip qana qoimai, aǵartýshylyq qyzmet te atqarady», - dep jalǵaidy kitap soavtory Baqytgúl Salyhova.
Kitapta Qazaqstandaǵy podkast salasynyń damýy, podkast taqyryptary men formattary, tyńdaýshylar qyzyǵýshylyǵy, salanyń bolashaǵy syndy suraqtar qamtylǵan. Ashyq aqparat kózderindegi podkastarǵa taldaý jasalyp, elimizdegi podkastardyń klassifikatsiiasy usynylǵan.
«Jyldan jylǵa qazaq tilinde shyǵatyn kitaptardyń sany artyp keledi. Shetel ádebieti, shetel oqýlyqtaryn qazaq tiline aýdarý bir izge qoiyldy. Biraq bizge otandyq kontekstke, qandai da bir sala týraly zertteýge negizdelgen jergilikti avtorlardyń jumystaryna nazar salý kerek. Alqa baspasy áiel zertteýshi, jazýshylarǵa basymdyq beretindikten osy kitapqa qýana basyp shyǵardyq», - deidi Alqa Publishing baspasynyń bas redaktory Baian Hasanova.
Kitap satylymǵa shyqty, ony Alqa Publishing baspa úiinen jáne Meloman dúkenderinen taba alasyzdar.
