Almaty qalasy Almaly aýdandyq qylmystyq soty A.J. Bitimbaevty terrorizm aktisine daiyndalý, terrorizmdi nasihattaý, dini alaýyzdyqty qozdyrý jáne atys qarýyn zańsyz saqtaý faktileri boiynsha 10 jylǵa sottady. Úkim zańdy kúshine endi, dep habarlaidy Ulttyq qaýipsizdik komitetiniń baspasóz qyzmeti.
Ol UQK nazaryna destrýktivti dini ideologiiany ustanýshy jáne Qazaqstan Respýblikasynda tyiym salynǵan «DAISh» halyqaralyq terroristik uiymynyń jaqtasy retinde ilikti.
«Tekserý barysynda onyń Internette «DAISh» úgit-nasihatynyń yqpalymen halyq kóp shoǵyrlanǵan oryndarda jarylǵyshty paidalanyp, teraktiler daiyndaýy týraly aqparat alyndy. Qarýly shabýyl jasaǵannan keiin ol shetel sodyrlarynyń qataryna ótý jáne terroristik áreketin jalǵastyrý úshin Siriiaǵa jetýdi josparlaǵan. Ol biylǵy sáýirde Almatyda ishki ister organdaryn tarta otyryp, UQK kúshimen ustaldy» delingen habarlamada.
Tintý kezinde odan atys qarýy men travmatikalyq qarý, qoldan jasalatyn jarylǵysh quraldar jasaýǵa arnalǵan quramdas bólshekter, úsh saýda-oiyn-saýyq ortalyǵynyń syzbalary, betperde men qolǵap alyndy.
Bitimbaevtyń kinási kýágerlik túsiniktermen, zattai jáne ózge de aiǵaqtarmen tolyq dáleldendi.
