Almatyda órtengen úiden er adam óli tabyldy, - dep habarlaidy "Ult aqparat" Polisia.kz saityna silteme jasap.
Ostroýmova kóshesindegi úilerdiń birinde órt shyqqany týraly habarlama "101" pýltine keshki saǵat 21:00 shamasynda túsken.
– Órtti lokalizatsiialaǵannan keiin bólmelerdiń birinen zorlyq-zombylyq belgileri bar er adamnyń máiiti tabyldy. Keiin bul – úidiń iesi, 38 jastaǵy K.esimdi azamat ekendigi anyqtaldy. Buryn júk kóliginiń júrgizýshisi bolyp jumys istegen. Biraq densaýlyǵyna bailanysty birneshe aidan beri esh jerde jumys jasamaǵan. Sot-meditsinalyq saraptamasynyń qorytyndysyna sáikes, adamnyń ólimine – moiynnyń kesilgen jaraqaty, sol jaqtaǵy keýde tusyndaǵy pyshaq jaraqaty, ishtiń jáne sol jaq buǵana aimaǵyndaǵy enip ketken pyshaq jaraqattary jáne odan keiingi máiitti órteý sebep bolǵan. Tergeý barysynda 44 jastaǵy P.esimdi azamat anyqtaldy, ol qylmys jasalmas buryn jábirlenýshiniń úiine qonaqqa kelgen, – dedi Túrksib aýdandyq PB janyndaǵy politsiia bóliminiń bastyǵy Meiirhan Jańabaev.
Er adamdardyń alkogoldik ishimdik ishkeni anyqtaldy. Olardyń arasynda janjal týyndap, onyń barysynda P.esimdi azamat úi iesine birneshe ret pyshaq jaraqatyn salǵan.
– Qylmystyń izin jasyrý úshin kúdikti úige órt qoiǵan. Atalǵan derek boiynsha QR QK-niń 99-baby 1-bóligine sáikes qylmystyq is qozǵaldy. Jaýap alý kezinde ustalǵan adam, as úi pyshaǵyn birinshi bolyp úi iesiniń ustaǵanyn, ol onyń qolynan julyp alyp, oǵan birneshe ret ólimshi soqqylar jasaǵanyn aitty. Kisi óltirýdiń naqty mán-jaiy tergeý barysynda anyqtalatyn bolady, – dedi Jańabaev.
