Almatyda Qazaqstandaǵy mehanizmder men mashinalar teoriiasy ǵylymi mektebiniń negizin qalaýshy, akademik Ómirbek Aryslanuly Joldasbekovtiń týǵanyna 90 jyl tolýyna orai «Bolashaq mehanikasy» atty halyqaralyq Joldasbekov simpoziýmy bastaldy, dep habarlaidy "Ult aqparat".
Naýryzdyń 1-5 aralyǵynda ótetin simpoziýmdy BǴM ǴK akademik Ó.A.Joldasbekov atyndaǵy Mehanika jáne mashinataný institýty jáne Qazaqstan Respýblikasynyń Ulttyq injenerlik akademiiasy, ál-Farabi atyndaǵy QazUÝ, Q.Sátpaev atyndaǵy QazUTÝ jáne «NAZ» JShS qoldaýymen uiymdastyryp otyr.
Simpoziýmnyń ashylý saltanatynda Ómirbek Joldasbekov týraly baiandama jasalyp, kózi kórgender estelik aitty.
«Ómirbek Arsylanuly - ol naǵyz tulǵa. Ol mektepti altyn medalmen bitirgen. Odan keiin M.V.Lomonosov atyndaǵy ýniversitetin qyzyl diplomen támamdady. Eńbek jolyn týǵan jeri Shymkentte bastady. Ol kisini stýdentter óte jaqsy kórdi. Óte qarapaiym boldy. 1962 jyly 31 jasynda ǵylym kandidaty boldy. 1973 jyly 42 jasynda ǵylym doktory boldy. Ol kezde ǵylymi ataqqa ie bolý óte qiyn bolatyn. Talap kúshti edi. Ol - bar ǵumyryn QazUÝ-ge arnaǵan jan», - deidi Ulttyq ǵylym akademiiasynyń prezidenti Murat Jurynov.
Óz kezeginde memleket jáne qoǵam qairatkeri Baqytjan Jumaǵulov akademik Ómirbek Joldasbekov tárbielegen shákirtteri búginde elimizdiń damýyna úles qosyp júrgenin atap ótti.
«Eń aldymen Ómirbek Joldasbekov myqty shákirtter tárbieledi. Ár salany damytý úshin kúsh saldy. Osy kisiniń kóregendiginiń arqasynda JOO ǵylymi jumystarmen ainalysýǵa múmkindik týdy. Iaǵni, ol ǵylymi mektep qalyptastyrdy. 25 doktor, 100 kandidat daiyndady»,- dedi Baqytjan Jumaǵulov.
Aita keteiik, simpoziýmda AQSh, Resei, Frantsiia, Japoniia, Túrkiia, Iran, Irak, Polsha jáne taǵy basqa 15 elden kelgen ǵalymdardyń qatysýymen 120-dan astam ǵylymi baiandama jasalmaq.
Buǵan deiin ýniversitet rektory Janseiit Túimebaev bastaǵan joǵary oqý ornynyń basshylyǵy, ǵylymi qoǵam ókilderi, Ómirbek Joldasbekovtiń otbasy músheleri, kezinde birge jumys istegen áriptesteri, dos-jarandary, shákirtteri jáne stýdentter akademikti eske alyp, rýhyna taǵyzym etip eskertkishine gúl shoǵyn qoidy.
