Adam quqyǵyn qorǵaý uiymy ókilderi men táýelsiz quqyq qorǵaýshylarǵa jappai ereýil kezinde ustalyp, qamalǵan jandarmen júzdesýge ruqsat berildi. Bul týraly QR Bas prokýratýrasy birinshi qyzmet basshysynyń orynbasary Eldos Qilymjanov OKQ-de ótken baspasóz máslihatynda málim etti, dep habarlaidy QazAqparat.
«Túsindirip ótken jón bolar, bir qylmystyq is boiynsha birneshe adam, iaǵni sybailas qatysýshylar bolýy múmkin. Bul derekter áli de túpkilikti emes. Olar prokýratýramen ustaý negizderin tekserý jáne sotta qamaýǵa alý isteriniń qaralý nátijesine bailanysty. Atap aitqanda, 29 ustalǵan tulǵany sot qamaýǵa alýǵa bas tartqan, olar qazir bosatyldy. Prokýrorlar qamaýǵa alynǵandardy kúndelikti tekserýde», - dedi ol.
Bas prokýratýra ókiliniń aitýynsha, aiyby joq 96 adam ýaqytsha ustaý izoliatorlarynan bosatylǵan.
«Prokýrorlar Almaty qalasynyń ýaqytsha ustaý izoliatoryn tekserý kezinde dene jaraqaty bar 73 adamdy anyqtady. Onyń ishinde úsheýine qatysty bultartpa sharasy ózgertildi, olar qazir bostandyqta. Bizdiń nusqaýmen ustalǵandardyń arasynda oq jaraqatyn alǵan 29 adam qalalyq aýrýhanaǵa jatqyzyldy. Qamaýǵa alynyp, jaraqat alǵan 41 jan tikelei izoliatorda em alýda. Qatygezdikpen qaraý, sondai-aq meditsinalyq kómekti kórsetpeý yqtimal jaǵdailaryn táýelsiz tekserý maqsatynda adam quqyqtary jónindegi ýákil jáne basqa da adam quqyǵyn qorǵaý uiymdaryna ustaý mekemelerine kirýge ruqsat berildi», - deidi ol.
