Almatyda qardyń tolassyz jaýǵanyna bir táýlik boldy. Boljam boiynsha búgin tústen keiin toqtaý kerek, dep habarlaidy "Ult aqparat".
Taýly jáne taý bókterlerindegi aimaqtarǵa 10-12, al qalaǵa 6-8 sm qar tústi.
Kóktaiǵaqtyń aldyn alý úshin qar jaýǵan kezden bastap joldarǵa, qiylystar men jolairyqtardyń kireberisine, taý bókteri men taýly aimaqtarǵa kóktaiǵaqqa qarsy qospa sebilip, qar tazalandy. Kóktaiǵaqqa qarsy 243 tonna material paidalanyldy.
Trotýar, jaiaý júrginshi aimaqtaryn, qoǵamdyq kólik aialdamalaryn, avtoturaq qaltarystaryn, jer ústi ótkelderin jáne ortaq paidalanylatyn jerlerdi tazartý júrgizilip jatyr.
Qar tazalaýǵa 395 arnaiy tehnika, onyń ishinde 136 qum shashatyn tehnika bar, 965 jumysshy jumyldyrylǵan.
Aýdandyq ákimdikter men qala ákimdiginde qar tazalaýdy táýlik boiy baqylaityn kezekshilik uiymdastyrylǵan.
Qazgidromettiń boljamy boiynsha, jaýyn-shashyn 22 sáýirde túste saiabyrlaidy.
