10-17 naýryz aralyǵynda Almatyda zańsyz júrgen azamattardy anyqtaý jáne qalada kriminogendik jaǵdaidy jaqsartý maqsatynda «Migrant» respýblikalyq jedel-aldyn alý is-sharasy ótýde, dep habarlaidy QazAqparat.
Is-sharanyń tórt kúninde QR kóshi-qon zańnamasyn buzǵan 1 263 adam anyqtaldy jáne ákimshilik jaýapkershilikke tartyldy.
«Qazaqstan Respýblikasy aýmaǵynan 101 sheteldik, onyń ishinde jeti adam azamattyq sot isin júrgizý arqyly elden shyǵaryldy. Qazaqstan Respýblikasynda bolý erejelerin buzǵany úshin 951 sheteldik ákimshilik, sheteldikterdiń Qazaqstan Respýblikasynda bolýynyń zańdylyǵyn qamtamasyz etý sharalaryn qoldanbaǵany úshin 282 qabyldaýshy tarap jaýapkershilikke tartyldy. Qazaqstan Respýblikasyna sheteldik jumys kúshin tartý erejelerin buzǵan 30 jumys berýshi de jazalandy. Sonymen qatar, zańsyz kóshi-qon arnasyn uiymdastyrýdyń 6 deregi anyqtaldy jáne tirkeldi», – dedi Almaty qalalyq politsiia departamentiniń Kóshi-qon qyzmeti basqarmasynyń bastyǵy Ashat Býtýnchinov.
Quqyq buzýshylardyń arasynda qolyna emizýli sábiin ustap, bazarda qaiyrshylyqpen ainalysqan 26 jastaǵy Ózbekstan azamatshasy da bar.
Sondai-aq, 2017 jyldan beri Qazaqstan Respýblikasynyń aýmaǵynda jeke basyn kýálandyratyn qujatsyz jáne turaqty turǵylyqty jeri joq bolyp júrgen 50 jastaǵy Ózbekstan azamatyna qatysty ákimshilik shara qoldanyldy. Sot sheshimimen ol el aýmaǵynan shyǵaryldy.
