Almatyda meningokokk juqpasynan 27 jastaǵy órt sóndirýshi jigit 12 saǵatta qaitys bolyp ketti, dep habarlaidy QazAqparat tilshisi.
Oljas Súleimenov 2 maýsymda dene qyzýy kóterilip, tamaǵy aýyryp, aýrýhanaǵa jetkizilgen.
«2 maýsymda kúni boiy qyzýy kóterildi. Ol jai tumaý shyǵar dep mán bermedi. Keshke jaǵdaiy nasharlaǵan soń jedel járdem shaqyrdyq. Alaida, tańǵa jýyq qaitys bolyp ketti», - dedi Oljastyń týǵan aǵasy Erbolat.
Marqumnyń jaqyndary jerleý sharasyn búginge josparlaǵan bolatyn.
Alaida, olar marqumnyń denesin máiithanadan ala almai jatyr. Múrde saraptamaǵa jiberilgen.
Aǵasynyń aitýynsha, Oljas aýyrǵan bette jedel járdem shaqyrǵan. Qalalyq juqpaly aýrýlar aýrýhanasynda oǵan juqpaly respiratorly virýs degen diagnoz qoiylyp, antibiotik alyp úiine qaitarylǵan.
Úiine jetkizilgen Oljastyń jaǵdaiy odan ári nasharlaǵan soń túnde jigitti qaitadan aýrýhanaǵa alyp ketken. 3 maýsymda tańǵa jýyq jigit qaitys bolyp ketti.
Dosynyń aitýynsha, Oljas qalalyq TJD órt sóndirýshi bolyp jumys istegen.
Sonymen qatar, qazir juqpaly aýrýlar aýrýhanasynda Oljaspen bailanysta bolǵan adamdar da baqylaýǵa alyndy.
Aita ketý kerek, búginde Almatyda meningokokk juqpasynan 5 adam kóz jumdy. Olardyń barlyǵynda meningokok juqpasynyń gerenalizdi formasy bolǵan. Jedel asqynýdyń kesirinen nebári 3-5 saǵatta marqum bolyp ketti.
Olardyń ishinde 4-5 jastaǵy balalar bar.
Al, Almaty oblysynda qaza bolǵandardyń sany 3 adamǵa jetti.
Sondai-aq, Qyzylorda oblysynda 27 jastaǵy jigit atalǵan juqpadan kóz jumǵan.
