Almatyda №126 avtobýstyń júrgizýshisi 23 jastaǵy qyzdy qaǵyp, mert qylǵan jaǵdaiǵa bailanysty oqiǵanyń mán-jaiy anyqtaldy, - dep habarlaidy Tengrinews.kz tilshisi.
"Green Bus Company" JShS almatylyq filialynyń ókilderi oqiǵanyń tańǵy 8-de Tóle bi men Ótegen batyr kósheleriniń qiylysynda bolǵanyn aitty.
Júrgizýshi qyzdy qaqqan kezde baǵdarshamnyń qyzyl túsine ótkenin moiyndapty.
"Júrgizýshiniń aitýynsha, ol Tóle bi kóshesimen shyǵys baǵytta baǵdarshamnyń jasyl túsine ótip bara jatqanda, jolǵa qyz atyp shyqqan. Júrgizýshi dereý toqtai almai, qyzdy qaǵyp ketken. Alǵan jaraqatynan qyz bala oqiǵa ornynda qaza tapty. Qaitys bolǵan qyz 1994 jylǵy ekeni anyqtaldy. Jol-kólik oqiǵasyniń mán-jaiyn jol politsiia qyzmetkerleri ainalysyp jatyr. Sonymen qatar, bizde tehnikalyq tustaryn anyqtap, tekserý júrgizip jatyrmyz", - dedi "Green Bus Company" JShS almatylyq filialynyń direktory Baýyrjan Qulyshev.
Onyń málimetinshe, avtobýs tizgininde OQO týmasy 1977 jylǵy Jánibekov Ánýar Muqanuly bolǵan. 2016 jyly 12 qazanda ol "Green Bus Company" JShS almatylyq filialynyń № 3 kommýnaldyq avtobýs parkine (KAP) jumysqa turǵan. 2017 jyly 1 jeltoqsanda № 1 KAP-qa aýysqan. Jalpy eńbek ótili - jeti jyl. Úilengen, úsh balasy bar.
"Júrgizýshi bizde istep jatqanyna eki jyl boldy. Osy kúnge deiin onyń tarapynan eshqandai ereje buzýshylyq bolǵan emes. Biz oǵan jaqsy jaǵynan baǵa beremiz", - dedi Baýyrjan Qulyshev.
Avtoparktegiler qaitys boǵlan qyzdyń otbasyna kómektesýge ýáde berdi.
"Biz jerleý rásimine ketken shyǵynnyń barlyǵyn óz moinymyzǵa alamyz. Bul bizdiń júrgizýshiniń kinási. Sondai-aq qyzdyń otbasy saqtandyrý kompaniiasynan aqsha alady", - dedi ol.
Eske salaiyq, jol-kólik oqiǵasy búgin Tóle bi men Ótegen batyr kósheleriniń qiylysynda bolǵan. Kýágerlerdiń aitýynsha, 126-baǵyttaǵy avtobýs júrgizýshisi Tóle bi kóshesimen shyǵys baǵytta kele jatqan. Biraq jedel járdem kelgende áiel alǵan jaraqattarynan qaza bolǵan.
