Zeinetsiz eńbek! Búgin bir top oralman Almatydaǵy Qytai konsýldyǵyna aryzdaryn ótkizýge jinaldy. Kezinde shekara asyp kelgen qandastyrymyz, Qytaidan alyp kelgen qomaqty zeinetaqydan qaǵylǵandaryna narazy. Qytai zańy boiynsha zeinetke sol elde shyǵyp, keiin basqa jaqqa qonys aýdarsa da zeinetaqy tólenýi tiis deidi olar. Biraq kórshi eldiń biligi óz mindetterin oryndamai otyrǵan kórinedi.
Shaý tartqan shaqta ai saiynǵy aqylarynan qaǵylǵandar búgin Qytai konsýldyǵynyń aldyna jinaldy. Aryzdaryn qoltyqtaǵan aǵaiyn Qytaidyń ózderi shyǵarǵan zańdy ózderi saqtamai otyrǵandaryna narazy. Ǵumyrlarynyń 60 jyldan astamyn Qytaida súrip, sol jaqta eńbek etip, keiin Qazaqstanǵa oralyp azamattyq alǵan qandastarymyz tógilgen ter esh ketti dep opynady.
Fatima Áskerbai, Almaty qalasynyń turǵyny:
- Qytai respýblikasynyń ata zańynda anyqtap turyp aitylǵan bul áńgime. Ol jaqtaǵy bizdiń qamsyzdandyrýymyz da, zeinetaqymyz da toqtalmaidy. Eger toqtatyp jatqan jaǵdaida, jergilikti organ oǵan tartylady degen jeri taǵy bar. Máselen 20 bapta muǵajyrlar zańynda berilý kerek toqtamaidy dep jazylsa, 26 bapta osyny atqarmaǵan jaǵdaida buny sol zańdastyrmaǵan adam jaýapqa tartylady dep jazylǵan.
Iaǵni, Qytai zańynda sol jaqta zeinetke shyǵyp, keiin ózge eldiń azamattyǵyn alǵandarǵa alalaý bolmaityny, zeinetaqy toqtatylmaityny taiǵa tańba basqandai jazylǵan eken. Biraq, Shyńjan ólkesi ol erejeni pysqyrmaityndai. Túsken aryz-shaǵymdarǵa jóndi jaýap bermei, únsiz jatqan kórinedi. Jalǵyz aǵashtyń orman bolmaitynyn túsingen zeinetkerler búgin taily-tuiaǵy qalmai Almatydaǵy Qytai konsýldyǵynyń aldyna jinalǵan. Osyǵan deiin jekelei kelip, shaǵymdanyp kórgen. Biraq, mardymdy jaýap almai, taýlary shaǵylyp qaitqan eken.
Jumaǵali Mizambek, Almaty qalasynyń turǵyny:
- Qytaida 56 ult bar. Biraq olar teń qaramai otyr. Qýdalaý 2016-dan bastaldy. Odan buryn jaqsy bolatyn.
Qytai konsýldyǵy zeinetkerlerdi ishke kirgizýge qulyq tanytpady. Aryzdaryn alsyn dep «shabarmandaryn» jiberipti. Bul shaǵym boiynsha da naqty jaýaptyń qashan bolatyny belgisiz.
