Almatyda Qazaqstandaǵy Qytai elshiliginiń qoldaýymen «Úmit» atty Qazaqstandaǵy qytai azamattaryna arnalǵan mektep ashyldy. 2 qyrkúiekte mekteptiń ashylý saltanatynda Qytaidyń bas konsýly Go Tsin Tsiaý sóz sóilegen. Bul týraly Qytai bas konsýldyǵynyń elektrondy gazeti habarlaidy, - dep jazady arasha.kz.
«Qytai - san myńjyldyq mádenietke ie el. Onyń tarihy tym tereńde jatyr. Bul qytai urpaqtaryn biriktiretin kúsh. Qytai mádenieti óz dástúriniń urpaq sabaqtastyǵynyń arqasynda álem mádenietiniń ishindegi ómirsheńdikke ie. Qytai azamattary qai jerde júrse de dástúrin, mádenietin úirenip, óz júrekterindegi otanshyldyq rýhyn joǵaltpaýy tiis. Sol arqyly tamyryn tereńge jaiý kerek. Bul mekteptiń jumysy Qazaqstandaǵy jáne ózge shetelderdegi qytai kásiporyndarynyń, qytai mekemeleriniń sondai-aq qytai kásipkerleriniń qoldaýymen bir jyldan beri jumys istep keledi. Sol arqyly qoǵamdyq yqpaly da keńeidi. Mektepte oqyǵan balalar qytai mádenietin boiyna sińirip, óz otandaryna súiispenshiligin tereńdetip, «Qytai armanyn» júzege asyrýǵa kúsh salady. Jáne de olar Qazaqstan men Qytai arasyndaǵy dostyqqa altyn kópir bolyp, «Bir beldeý – bir jol» ekonomikalyq jobasynyń negizgi atqarýshylaryna ainalady. Mekteptiń túlekteri arqyly jergilikti jastar Qytaidy túsine alar dep úmittenemin», – depti Qytai bas konsýly Go Tsin Tsiaý.
Almatydaǵy mekteptiń ashylý saltanatynda mektep oqýshylary Qytai mádenietinen, qytai ánderinen, qytai biinen kontserttik baǵdarlama qoiǵan. Sharaǵa Qazaqstandaǵy Qytai banki, qytai ónerkásip banki, qytai munai-gaz kompaniialarynan jáne basqa qytailyq mekemelerden alpystan astam adam qatysqan.
