Almaty qalasynyń bas politseii shahardaǵy qylmystar sanynyń azaiý sebepteri týraly aityp berdi,dep habarlaidy "Ult aqparat".
Byltyr shahardaǵy qylmys deńgeii eki esege azaidy. Atap aitqanda, qoǵamdyq oryndarda quqyq buzýshylyqtardyń sany tómendedi, kóshedegi qylmystar da azaidy. Sonymen qatar, qylmystyń «izin sýytpai» ashý 12,3%-ǵa jaqsardy.
«Qalada qylmystyń azaiýyna úsh sebep áser etti, olar – karantindik sharalardy kúsheitý, politsiianyń modýldik beketterin qurý jáne jaiaý nariadtardy kóbeitý. Almaty qalasynda qoǵamdyq tártipti qorǵaýdy politsiianyń keshendi kúshteri aýlalar men kóshelerdi patrýldeý arqyly júzege asyrady. Búginde orta eseppen kúnine kóshede 1650 politsiia qyzmetkeri men Ulttyq ulannyń 660 áskeri qyzmetshisi eki aýysymda, 550 kriminogendi baǵyttaǵy aýlalardyń aýmaqtaryn barynsha qamtyp, qoǵamdyq tártipti qorǵaý úshin jumyldyrylǵan. Sonymen qatar, 37 eń kriminogendik aimaq anyqtaldy, ár aýdanda 4-5 aimaq, onda modýldik politsiia beketteri ornatylyp, jaiaý jasaqtardyń sany kóbeitildi. Jaiaý jasaqtardyń sany 100 patrýlge kóbeidi. Eger 2019 jyly 250 jaiaý patrýl bolsa, 2020 jyly olardyń sany 350 boldy,- dedi Almaty qalalyq Politsiia departamentiniń bastyǵy Qanat Taimerdenov.
Modýldik post patrýldik beketterdiń ortalyǵy. Patrýldik marshrýttar posttardan birdei qashyqtyqta bolatyndai etip qurylǵan, sol arqyly quqyq buzýshylyqtar týraly habarlamalarǵa jedel den qoiý, jaiaý júrginshiler men patrýldeýshi kólik quraldarymen radiobailanys arqyly júzege asyrylatyn aqparattarmen almasý jáne óńdeý múmkindigi beriledi.
Jedel den qoiý qylmyskerlerdi tez ustaýǵa jáne jetkizýge yqpal etedi jáne qyzmetkerlerdiń ózara almasýyn qamtamasyz etedi.
«Máselen, Alataý aýdanyndaǵy «Nurkent» shaǵyn aýdanynda 2020 jyldyń qyrkúiek-qazan ailarynda 17 qylmys tirkeldi. Sol jyldyń qarasha aiynda modýldik post ornatylǵannan keiin qylmystardy tirkeý kórsetkishi eki aida toǵyz ǵana qylmysty qurady. Onyń ishinde beseýi «izin sýytpai» ashyldy. Osylaisha, jaiaý júrginshiler men avtokólik nariadtarynyń sanyn qaita bólý, statsionarlyq modýldik politsiia beketterin qurý, aldyn alý jumystarynyń tiimdiligin arttyrady, azamattardyń ótinishterine jedel jaýap berýge múmkindik beredi jáne «qoljetimdi politsiia» qaǵidatyn júzege asyrýǵa yqpal etedi , – dep túiindedi Qanat Taimerdenov.
