Almatyda «Perinatologiia jáne balalar kardiohirýrgiiasy ortalyǵynda» jas bosanǵan ana aýyr halde jatyr. Bul týraly onlain brifing barysynda ortalyqtyń direktory Ǵani Bodyqov aitty, dep habarlaidy QazAqparat.
«Búginde bosanǵannan keiingi infektsiialyq bólimde bir ana ortalyqtyń jansaqtaý bóliminde eki jaqty pnevmoniiamen qosa preeklampsiianyń aýyr dárejesimen jatyr. Qazir jaǵdaiy turaqty, ózdiginen tynys alyp jatyr. Júkti áielderde pnevmoniia men koronavirýs infektsiiasyn emdeýdiń qiyndyǵy, júktilik aýyr akýsherlik patologiia aiasynda órship ketetindiginde. Sonymen qatar juqpaly aýrýdyń uryqqa juqtyrýdyń óte joǵary ekendigin este ustaý kerek», - dedi Ǵani Bodyqov.
Perinatologiia jáne balalar kardiohirýrgiiasy ortalyǵynda JRVI nemese COVID-19 belgisri bar emdelýshilerge arnap infektsiialyq-dispanserlik bólim uiymdastyryldy. Ol jeke qabyldaý bólimshesi bar bólek eki qabatty ǵimaratta ornalasqan.
«Onda jekelengen bosanýǵa deiingi jáne bosaný bólimi, bosanǵannan keiingi bólim, 5 reanimatsiia jáne neonataldy bólim kiredi. onda kez-kelgen klinikalyq jaǵdaiǵa arnalǵan jabdyqtar jáne shyǵyn materialdarymen tolyq qamtamasyz etilgen, qajet bolsa hirýrgiialyq kómek kórsetý sharasy da qarastyrylǵan. Bólimde anesteziia jáne tynys alý apparattary, ottegi pýnkti, bosaný jáne operatsiialar úshin fýnktsionaldy kereýet, tótenshe jaǵdaida kómek kórsetýge arnalǵan jinaqtarmen (akýsherlik qan ketý, preeklampsiia, anafilaktikalyq shok, neonataldy reanimatsiia) jabdyqtalǵan», - dedi spiker.
Direktordyń aitýynsha, eki aptada bul bólimde 41 syrqat emdelgen. 16 ana bosanyp, onyń ishinde 9 náreste kesar tiligi arqyly dúniege keldi. Jalpy 33 naýqas tolyq em alyp jazylyp shyqty. Náresteler arasynda PTR taldaýy barlyǵynda teris shyqqan.
