Almatyda qurylys alańynda munara krany qulady, dep habarlaidy QazAqparat.
Onyń videosy áleýmettik jelide tarady.
Almaty qalalyq ónerkásiptik qaýipsizdik departamentiniń málimetinshe, tótenshe jaǵdai Túrksib aýdanynda bolǵan.
«Jas qanat» shaǵynaýdanynda ornalasqan «Rembýs» JShS qurylys obektisinde salynyp jatqan 9 qabatty ǵimarattyń parapetine KB-308 relsti munara krany qulady. Qaza bolǵandar men zardap shekkender joq. Krannyń menshik iesi - «KBK» JK. Shart boiynsha kran «Meliorator» JShS-ne jalǵa berildi.
Departament taratqan málimetke sáikes, byltyr naýryz aiynda «Jetysý ónerkásiptik qaýipsizdik» JShS krannyń múmkindigin, ony odan ári paidalanýdy anyqtaýǵa saraptama júrgizgen.
«Sóitip, krandy paidalaný merzimi 2023 jyldyń naýryzyna deiin uzartyldy. Biylǵy 11 aqpanda «Meliorator» JShS hatyna sáikes krandy QR TJM ónerkásiptik qaýipsizdik komitetiniń Almaty qalasy boiynsha departamentiniń mamany iske qosty. Qazirgi ýaqytta departamentte munara kranynyń qulaýyn tekserý jónindegi komissiia quryldy. Tergeý nátijesin qosymsha habarlaimyz», - dep atap ótti vedomstvadan.
