Foto: QyzPÝ
Búgin Qazaq ulttyq qyzdar pedagogikalyq ýniversitetinde Qazaqstannyń eńbek sińirgen qairatkeri, Bilim berý isiniń úzdigi, ánshi, kompozitor, ómirin ónerimen órnektegen Aǵaisha Shermuhambetqyzy Isaǵulovanyń 80 jyldyq mereitoiy atalyp ótti, dep habarlaidy Ult.kz.
Aǵaisha Isaǵulova – QyzPU túlegi, ulaǵatty ustaz, talantty kompozitor ári oryndaýshy. Onyń oryndaýyndaǵy, shyǵarǵan jáne súiemeldegen 300-ge jýyq mýzykalyq jazba Qazaq radiosy men televideniesiniń «Altyn qorynda» saqtalǵan. Sonymen qatar halyq arasynda keńinen taraǵan 80-ge jýyq ánniń avtory. Vengriia, Polsha, Chehiia, Bolgariia, Germaniia, Litva, Ýkraina, Belorýs, Iýgoslaviia, Túrkiia, Tájikstan, Ózbekstan jáne Resei elderinde qazaq ónerin nasihattap, jeke án keshterin ótkizgen. Búginde professordyń ǵylymi-ádistemelik eńbekteri, mýzykalyq shyǵarmalary joǵary oqý oryndarynda, sondai-aq jalpy bilim beretin mektepterde keńinen qoldanylady.
«Men bul qara shańyraqqa 1963 jyly keldim. Tórt jyl bilim alyp, keiin institýtta qaldym. Qazaq qyzdaryn aialap, alaqanymyzǵa salyp, bilim berip, qoldap, úlken jolǵa baǵyttaǵan ustazdardyń birimin. Búgin ýniversitetim meni áspettep, qurmet kórsetip, 80 jyldyq mereitoiymmen quttyqtap jatyr. Barshańyzǵa sheksiz alǵysymdy bildiremin! 80 jas – men úshin qaitalanbas, erekshe beles. Shańyraǵymyz árdaiym biiktei bersin! Osy qýanyshty sátti uiymdastyryp, elep-eskergen Ýniversitet rektory Gúlmira Ámirhanqyzyna airyqsha alǵysymdy aitamyn!» - dedi QyzPU túlegi, Qazaqstannyń eńbek sińirgen qairatkeri, bilim berý isiniń úzdigi, ánshi, kompozitor Aǵaisha Isaǵulova.
Foto: QyzPÝ
Mereitoilyq keshke óner jáne mádeniet salasynyń maitalmandary, ýniversitet oqytýshylary men stýdentteri, professordyń shákirtteri jáne áriptesteri qatysty.
Is-shara barysynda Aǵaisha Isaǵulovanyń pedagogikalyq jáne shyǵarmashylyq eńbekteri týraly beinerolik kórsetildi. Sonymen qatar Basqarma Tóraǵasy-Rektory Gúlmira Qanai Aǵaisha Isaǵulovany mereitoiymen quttyqtap, Qazaq ulttyq qyzdar pedagogikalyq ýniversiteti atynan syilyq tabystady. Túlekter ustazdaryna júrekjardy alǵystaryn bildirip, jyly lebizderin jetkizdi.
«Búgin Qazaq ulttyq qyzdar pedagogikalyq ýniversitetinde úlken dúbirli toi ótýde. Ónerdegi ardaqty ustazymyz Aǵaisha Isaǵulova 80 jas mereitoiy atalyp ótýde. Aǵaisha ustazdyń shákirtteri óte kóp, olar búginde Qazaqstannyń túkpir-túkpirinde túrli salalarda abyroily qyzmet atqarýda. Biz ustazymyzdy shyn júrekten osy mereili jasymen quttyqtaimyz! Anamyzdai jaqsy kórip, qadirleimiz. Ustazymyzdyń biz siiaqty tárbielep ósirgen shákirtteri men halyqtyń júregine jol tartqan ánderi barda, Aǵaisha ustazymyz qazaq halqynyń júreginde máńgilik saqtalmaq», - dedi Qazaqstan Respýblikasynyń mádeniet salasynyń úzdigi, Qarasai aýdany, Shamalǵan aýylynyń Mádeniet úiiniń direktory Sharbaný Qalieva.
Foto: QyzPÝ
Aǵaisha Isaǵulovanyń bastamasymen «Aigúl» vokaldy-aspaptar ansambli, «Shattyq jyry» ansambli, «Óner jastan» opera teatry jáne basqa da óner ujymdary quryldy. Ásirese, «Aigúl» vokaldy-aspaptar ansambliniń dúniege kelýi – qazaq mýzyka ónerindegi aitýly oqiǵalardyń biri.
Mereitoilyq is-sharaǵa arnaiy kelgen «Aigúl» vokaldy-aspaptyq kvartetiniń múshesi Gúlnar Begalieva óz estelikterimen bólisti.
«Men osy ýniversitettiń eń alǵashqy túlekteriniń birimin. Mýzykalyq fakýltetke rektordyń ózi jolymyzdy ashyp, ári qarai osy jerde ósip-ónsin dep tórt qyzdy qaldyrdy. Ol jyldary bizge qazaq mýzykasynyń jaryq juldyzy, kompozitor Eskendir Hasanǵaliev sabaq berdi. Bir kúni Eskendir Hasanǵaliev: «Tórteýiń nege vokaldyq kvartet qurmaisyńdar?» — dep usynys aitty. Osylaisha, sol kisiniń ideiasymen kvartet quryp, sapaly repertýar daiyndaýǵa kiristik. Dál sol ýaqytta onyń «Jaǵadaǵy arý qyz» áni jańadan shyqqan edi. Bul ándi simfoniialyq orkestrdiń súiemeldeýimen oryndap, úlken sahnaǵa alyp shyqtyq. Kóp uzamai Máskeýde «Allo, my ishem talanty» atty konkýrs jariialanyp, biz de baq synaýǵa attandyq. Baiqaý qorytyndysy boiynsha laýreat atanyp, úlken jetistikpen oraldyq. Bul konkýrsta erekshe oqiǵa oryn aldy. Júrgizýshi búkil radio men teledidar arqyly kórermenderge: «Qazir bir án oryndalady. Eger bul án sizderge unasa, jaryqtaryńyzdy óshirińizder!» — dep habarlady. Biz ánimizdi oryndap bitkenshe, tek zaldaǵy kórermender ǵana emes, búkil Máskeý qalasy jaryǵyn sóndirip tastady. Mundai erekshe sátke bireý sener, bireý senbes, biraq bul biz úshin umytylmas oqiǵa boldy. Aǵaisha Isaǵulovanyń qazaq mýzykasyna sińirgen eńbegi zor. Osy aitýly kúni mereitoiymen shyn júrekten quttyqtai otyryp, shyǵarmashylyq jolynyń jarqyn bolýyn tileimin!» - dedi «Aigúl» vokaldy-aspaptyq kvartetiniń múshesi Gúlnar Begalieva.
Shara sońynda Aǵaisha Isaǵulova ýniversitet basshylyǵyna, sondai-aq keshtiń qurmetti qonaqtaryna júrekjardy alǵysyn bildirip, igi tilekterin arnady. Óziniń ustazdyq jolyndaǵy qoldaýy men qurmetine bólengen sátterin tebirenispen eske alyp, ýniversitet ujymyna shyǵarmashylyq tabys pen órkendeý tiledi.
