Ulttyq qaýipsizdik komiteti áshkerelep, ustaǵan zańsyz qarý-jaraq satqan qylmyskerler sottaldy, dep habarlaidy "Ult aqparat" komitettiń baspasóz qyzmetine silteme jasap.
Eske sala keteiik, ótken jyly maýsymda QR Ulttyq qaýipsizdik komiteti atys qarýyn jetkizýmen zańsyz ainalysqan halyqaralyq arnanyń jolyn kesken edi.
«Zańsyz ainalymnan 3 «Kalashnikov» avtomaty, 3 granataatqysh, 2 jaýyngerlik granata, 14 tapansha, 1700-den astam patron men qarýdyń kerek-jaraǵy alyndy. Almaty qalasy men Almaty oblysynyń 10 turǵyny qylmystyq jaýapqa tartyldy. Sotqa deiingi tergeý barysynda ishki ister organdary qyzmetkeriniń qylmysqa qatysy bary anyqtaldy. Laýazymdy adam QR IIM teńgeriminde turǵan oq-dárini urlap kelgen» dep habarlaidy komitetten.
Sonymen qatar, qarý qurastyrý boiynsha jasyryn sheberhananyń áreketi toqtatyldy.
Biylǵy 27 qańtarda Almaty qalasy Almaly aýdandyq sotynyń úkimimen aiyptalýshylar ártúrli merzimge bas bostandyǵynan aiyryldy.
