QR Bas prokýratýrasy Almatyda Gelandewagen men avtobýs soǵysqan sátte zardap shekkenderge kóńil bildirdi, - dep habarlaidy kaz.tengrinews.kz tilshisi.
"Bas prokýratýra Almatyda tizgininde prokýratýra qyzmetkeri otyrǵan "Mercedes Benz G400" kóliginiń jol apatyna ushyraýynan zardap shekkenderge kóńil bildiredi. Ol qyzmetkerge qatysty QR Ákimshilik quqyq buzýshylyq týraly kodeksiniń 610-babynyń 2-bóligi boiysha ákimshilik hattama toltyryldy", - dedi QR Bas prokýratýra ókilderi.
Ákimshilik quqyq buzýshylyq týraly kodekstiń 610-babynyń 2-bóliginde - "Kólik quraldary júrgizýshileriniń jol júrisi qaýipsizdigin qamtamasyz etýdiń belgilengen qaǵidalaryn adamdardyń densaýlyǵyna ziian keltirýge, kólik quraldarynyń nemese ózge de múliktiń búlinýine ákep soqqan buzýshylyǵy", jábirlenýshiniń densaýlyǵyna jeńil ziian keltirýge ákep soqqan dál sol áreket - 15 ailyq eseptik kórsetkish mólsherinde (35 000 teńge) aiyppul salýǵa jáne bir jyl merzimge kólik quralyn basqarý quqyǵynan aiyrýǵa ákep soǵatyny kórsetilgen.
Aita keteiik, qazirgi ýaqytta Almaty politsiiasy QR Qylmystyq kodeksiniń 345-babynyń 1-bóligi boiynsha ("Kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy") sotqa deiingi tergeý jumystaryn júrgizip jatyr.
"Conymen qatar, ishki tergeý jumystary bastaldy jáne biz osy jol-kólik oqiǵasyna qatysty obektiv zertteý júrgizemiz dep kepil beremiz", - dedi bas prokýratýradaǵylar.
Al osyǵan deiin avtobýspen soǵysqan Mercedes-Benz G-klass tizgininde Almaty prokýratýrasynyń qyzmetkeri bolǵany anyqtalǵan edi. "Shynymen de Mercedes-Benz G-klass tizgininde Almaty prokýratýrasynyń qyzmetkerleriniń biri bolǵan, ol 2017 jyldyń 2 mamyrynan bastap eńbek demalysynda júrgen", - dep habarlaǵan edi Almaty prokýratýrasyndaǵylar. Sondai-aq, keiinirek Gelandewagen men avtobýs soǵysqan sát túsirilgen video paida bolǵan edi.
Qazirgi ýaqytta Almaty prokýratýrasynyń ishki qaýipsizdik qyzmeti qyzmettik tekseristi bastap ketti. Sonymen qatar, jol-kólik oqiǵasynan zardap shekken eki jasar qyz, qalalyq quzyrly organnyń málimetinshe, jol talǵamaityn kóliktiń salonynda bolǵan. Onyń jaǵdaiyn dárigerler aýyr dep baǵalaǵan, ol keýde tusynan jaraqat alyp, bassúiek miy zaqymdalǵan.
Almaty prokýratýrasynyń málimetinshe, 11 mamyrda Mercedes kóligi Raiymbek dańǵylymen shyǵys baǵytta kele jatyp, Potemkin kóshesimen (Tilendiev kóshesine jaqyn mańda) qiylysatyn jerde ońǵa manevr jasaý kezinde № 63 baǵytynda júretin Yutong markaly avtobýsqa soǵysqan. Qoǵamdyq kólik te shyǵys baǵytqa arnaiy avtobýstarǵa arnalǵan jolaqpen ketip bara jatqan. Jol-kólik oqiǵasynyń saldarynan qoǵamdyq kóliktiń 17 jolaýshysy jáne Mercedes avtomobiliniń ishinde otyrǵan sábi ártúrli jaraqat alǵan. Zardap shekkenderdiń barlyǵy qalalyq aýrýhanalarǵa jetkizildi.
Jol apaty deregine qatysty QR Qylmystyq kodeksiniń 345-baby ("Kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy") boiynsha júrgizilip jatyr.
Eske salaiyq, búgin jol-kólik oqiǵasy Raiymbek dańǵylynyń boiynda Tilendiev kóshesimen qiylysqan tusta boldy. Kóptegen kýágerlerdiń aitýynsha, № 63 baǵytynda júretin qoǵamdyq kóliktiń júrgizýshisi shyǵys baǵytta avtobýstarǵa arnalǵan arnaiy jolaqpen kele jatqan. Osy baǵytta kele jatqan Mercedes-Benz G-klass Tilendiev kóshesine jetpei Potemkin kóshesine ótý úshin dereý burylǵan. Soǵysý saldarynan Mercedes-Benz G-klass 20 metrge ushyp ketken, al jolaýshylar avtobýsy baǵanǵa soǵysqan. Aldyn ala málimetter boiynsha, jol apatynyń saldarynan 15 adam zardap shekken, onyń ishinde avtobýstyń da, jeńil kóliktiń de júrgizýshisi bar. Barlyǵy aýrýhanaǵa jetkizilgen.
