Kórneki sýret: ronstik/Getty Images
QMA Almaty qalasy boiynsha departamenti Hit beat music dep atalatyn qarjy (investitsiialyq) piramidasyn qurý jáne basqarý kúdigi boiynsha sotaldy tergep-tekserýdi bastady. Uiymdastyrýǵa kúdikti jarnamalyq shoý-prezentatsiialardy ótkizý kezinde ustaldy, - dep habarlaidy "Ult aqparat" vedomstvonyń baspasóz qyzmetine silteme jasap.
"Hit beat music (HBM Group) investitsiialar salasyndaǵy aqparattyq-taldamalyq kompaniia retinde jasyrynyp, óziniń zańsyz qyzmetin júzege asyratyny anyqtaldy. Kompaniia sengish azamattarǵa turaqty syiaqy alýǵa kepildik beretin kanadalyq mýzykalyq investitsiialyq jobalarǵa aqsha salýdy usyndy. Sonymen qatar, Hit beat music (HBM Group) Qazaqstan aýmaǵynda zańdy tulǵa, ókildik jáne filial retinde tirkelmegen, sondai-aq ashyq banktik shoty joq", - delingen habarlamda.
QMA málimetinshe, salymshylardyń jarnalary kiris kassalyq orderlerin resimdemei qolma-qol nysanda júrgiziledi.
"Tirkelgen paidalanýshylardyń jalpy sany 2300-den asady. Qazirgi ýaqytta Hit beat music uiymdastyrýshysyna qatysty 2 aiǵa deiingi merzimge "qamaýda ustaý" túrindegi bultartpaý sharasy sanktsiialandy", - delingen habarlamada.
QMA men prokýratýra organdary azamattardy qyraǵy bolýǵa jáne óz jinaqtaryn kúmándi qarjy uiymdaryna salmaýǵa shaqyrady.
"Eger siz jáne sizdiń jaqyndaryńyz Hit beat music qyzmetine tap bolsa, QMA call - ortalyǵyna habarlasýyńyzdy suraimyz", - deidi QMA ókilderi.
