Foto: ashyq derekkóz
24-30 qarasha aralyǵynda Almatyda «Eýraziia» halyqaralyq kinofestivali ótedi. Bul festival Ortalyq Aziiadaǵy eń bedeldi mádeni sharalardyń biri sanalady. Biyl qazylar alqasynyń 70%-yn Túrkiia, Qytai, Frantsiia, Ózbekstan, Qyrǵyzstan, Resei, Shvetsiia jáne Marokko elderinen kelgen sheteldik mamandar quraidy, dep habarlaidy Ult.kz.
Kinofestivalde álemdik kinematografiianyń úzdik ókilderi, rejisserler, akterler men stsenarister bir alańda bas qosyp, kinoindýstriianyń jańa úrdisterin talqylap, tájiribe almasady.
Festivaldiń basty baiqaýyna túrik rejisseri, Kann kinofestivaliniń «Altyn palma butaǵy» iegeri Nýri Bilge Djeilan tóraǵalyq etedi. Qazylar quramynda Rano Shodieva (Ózbekstan), Nada Ajari Gillon (Frantsiia), Erlan Nurmuhambetov (Qazaqstan) jáne Artyqpai Súiindikov (Qyrǵyzstan) bar.
Ortalyq Aziia jáne túrki álemi elderi baiqaýyn qytailyq rejisser Li Baohýa basqarady. Qazylar alqasynda marokkolyq Abdelila El Djaýhari, reseilik Aleksei Telnov jáne qazaqstandyq prodiýser Janna Qýanysheva bar. Sondai-aq, Aziia kinosyna erekshe kózqaraspen qaraityn NETPAC qazylar toby festivalge qatysyp, arnaiy marapattar usynady.
Festivaldiń jalpy júlde qory 20 million teńgeden asady. Bas júlde iesi 4 million teńge alady. Bul kino salasynyń otandyq jáne sheteldik ókilderin jańa jobalarǵa shabyttandyratyny sózsiz.
Kórsetilimder Kinopark 11 IMAX Esentai kinoteatrynda 25-30 qarasha aralyǵynda ótedi. Eń bastysy – festivaldiń barlyq sharalary men film kórsetilimderi kórermenderge tegin usynylady.
Festivaldi uiymdastyrýshy – QR Mádeniet jáne aqparat ministrligi, al sharanyń negizgi úilestirýshisi Sháken Aimanov atyndaǵy «Qazaqfilm» ulttyq kinostýdiiasy. Mádeni sharaǵa KAZ Minerals, Sarens Kazakhstan, Salem Entertainment, Kinopark Theatres, Eurasian Resources Group (ERG) jáne Astana Motors kompaniialary demeýshilik etedi.
«Eýraziia» kinofestivali – kino álemin biriktirip, zamanaýi kinematografiianyń damý baǵytyn anyqtaityn erekshe alań. Almaty turǵyndary men qonaqtary festival arqyly álemdik deńgeidegi kino týyndylarmen tanysýǵa múmkindik alady.
Oqi otyryńyz: 60 film, 3 talap: Aibarsha Bójeeva festivaldik kino qalai irikteletinin aitty
