Almatydaǵy №5 qalalyq klinikalyq aýrýhananyń bazasynda Qazaqstandaǵy alǵashqy aýdiologiialyq skriningti súiemeldeý boiynsha treking-ortalyq ashylyp, estý qabileti buzylǵan patsientterdiń biryńǵai tirkelimin engizý bastaldy. Joba Sýrdologiia boiynsha quzyret ortalyǵynyń bazasynda júzege asyrylyp jatyr, dep habarlaidy ult.kz.
Jańa júie «Men estimin» pilottyq jobasy aiasynda synaqtan ótip, tiimdiligin dáleldedi. Joba Almatydaǵy úsh perzenthana, úsh alǵashqy meditsinalyq-sanitariialyq kómek uiymy jáne eki sýrdologiialyq kabinetti qamtyǵan.
Almaty qalasy Densaýlyq saqtaý basqarmasynyń basshysy Marat Pashimovtyń aitýynsha, aldaǵy ýaqytta qaladaǵy barlyq perzenthana men alǵashqy meditsinalyq kómek uiymdary osy júiege kezeń-kezeńimen qosylady. Bul balalardyń estý qabiletindegi aqaýlardy erte anyqtap, olardy úzdiksiz baqylaý men emdeýdiń biryńǵai tetigin qalyptastyrýǵa múmkindik beredi.
«Men estimin» jobasy náresteni alǵashqy aýdiologiialyq skriningten bastap diagnoz qoiý, emdeý, estý apparattarymen qamtamasyz etý jáne ońaltý kezeńderiniń barlyǵyn qamtidy. Onyń negizgi bóligi – treking-ortalyq. Ortalyq naqty ýaqyt rejiminde skrining nátijelerin qabyldap, «jasyl dáliz» qaǵidaty boiynsha qosymsha tekserýlerdi uiymdastyrady jáne estý qabileti buzylǵan balalardy turaqty súiemeldeýdi qamtamasyz etedi.
Júieniń alǵashqy nátijeleri de belgili boldy. 2026 jyldyń basynan beri 11 balanyń tolyq estimeitini erte kezeńde anyqtalyp, olardyń barlyǵyna kohlearlyq implantat ornatyldy. Qazir balalar ońaltý kýrsynan ótip jatyr.
Joba tolyq iske qosylǵannan keiin jyl saiyn 90 myńnan astam bala aýdiologiialyq monitoringten ótedi dep josparlanǵan. Bul nárestelerdegi aýyr estý buzylystaryn der kezinde anyqtap, emdeýdi erte bastaýǵa jol ashady.
Sonymen qatar estý qabileti buzylǵan balalar men eresekter týraly málimetterdi biriktiretin biryńǵai tirkelim engiziledi. Bul patsientterdi diagnostikadan bastap emdeý men ońaltýǵa deiin úzdiksiz baqylaýǵa múmkindik berip, mamandandyrylǵan kómektiń sapasyn arttyrýǵa yqpal etedi.
Jyl basynan beri №5 qalalyq klinikalyq aýrýhananyń Sýrdologiia boiynsha quzyret ortalyǵy MÁMS aiasynda estý qabiletin jaqsartýǵa baǵyttalǵan 200-den astam operatsiia jasap, 400-den astam adamǵa estý apparattaryn alýǵa joldama bergen. Qazir ortalyqqa Qazaqstannyń barlyq óńirinen patsientter júginedi, olardyń 58 paiyzy – Almaty qalasynyń turǵyndary.
