Almatyda eski úiler arzandai bastady. Buǵan naryqtyń naǵyz baǵasyna jurttyń birte-birte kóndigýi sebep eken. Iaǵni, dollardyń 180 teńge kezindegi baǵamynan áli shyǵa almai júrgen kóp turǵyn buǵan deiin neǵurlym qymbat baǵany qoiatyn. Tipti, jasatqan jóndeýine deiin ústeme aqsha suraityndary da ol ádetin qoiyp, saýdalasýǵa kóne bastapty. Esesine, Astanada baǵa eselep ósýi múmkin. Sebebi, EKSPO dep alaqanyn ysqylap otyrǵan jurt jappai jyljymaityn múlik ielenýge umtylyp jatyr. Bul týraly KTK telearnasy habarlady.
Almatyda eski úilerdiń baǵasy ekpinin jaimen basa bastady. Buǵan deiin jańa úilerden de joǵary baǵalanǵan páterler birazdan beri ótpei qalsa kerek, qojaiyndary aspannan alyp qoiǵan qunyn tómendetýge májbúr. Salynǵan jylyna qaramai, sapasyn aityp esti alatyn eski úilerdiń ieleri endi ol ádetin qoiǵan.
"Satýshylar sabasyna túse bastady. Eski úilerdiń ieleri osyǵan deiin baǵany túsirmei kelgen. Óziniń o bastaǵy satyp alǵan aqshasyn qaitarǵysy kelip, qosyp suraityn. Qazir jaǵdai basqasha. Klientteri jańa úilerge kete bastaǵan soń qojaiyndar saýdalasýǵa kónip jatyr", - deidi jyljymaityn múlik agenttiginiń direktory Nina Lýkianenko.
Saýdasy júrmegen úi ieleri rieltorlardyń da ábden mazasyn alǵan. Nina Lýkianenkonyń aitýynsha, páter satýshylardyń tipti artyq aqsha jasaýdyń qamymen, jasaǵan jóndeýine de qosymsha tiyn suraǵan. Endi ondailardyń dáýiri ótipti. Óitkeni jańa úilerge suranys artqan. Máselen, byltyr Almatyda sý jańa úi satyp alýshylardyń sany 57 paiyzǵa ósipti. Al Astanada saýda tipti qyzǵan. Ásirese, EKSPO-nyń arqasynda jyljymaityn múlik agentttikteri baiyp, klientke talas bop jatyr.
Telearnaǵa bergen suhbatynda rieltor Aiaýlym Bolatqyzy jańa qurylystardyń kóbeiip jatqanyn aityp otyr. "Egerde siz alam deseńiz kóbine sizdiń tańdaýyńyzǵa bailanysty júginedi. Óitkeni, qazirgi kezde bizdiń Astanamyzdy alatyn bolsaq, satylatyn páterler sany óte kóp. Jańa qurylystar kóbeiip kele jatyr", - dedi ol.
Osylai dep klienttiń asty-ústine túsken astanalyq rieltorlar ekinshi jartyjyldyqta baǵa ósýi múmkin dep otyr. Óitkeni, EKSPO-ny kútip alaqanyn ysqylap otyrǵan jurt jyljymaityn múlikti biznes kózine ainaldyrmaqshy.
Mamandardyń aitýynsha, birden baspanaly bolýǵa shamasy jete bermeitin jurtqa basqa da múmkindikter bar. Rieltorlardyń aitýynsha, qazir kóptegen qurylys kompaniialary básekelesterden qalyp qoimas úshin jańa úilerdi qaryzǵa berip jatyr. Tek bastapqy jarnasyn quisańyz bolǵany. Biraq onyń da ai saiyn tóleitin aqshasy az emes eken.
