Almaty qalasynyń turǵyny epilepsiia jáne aqyl-oi damýynda ereksheligi bar 26 jastaǵy qyzyna qatysty jynystyq sipattaǵy qylmys jasalǵanyn aityp, quqyq qorǵaý organdarynyń sheshimine narazylyq bildirdi, dep habarlaidy ult.kz.
Jas Alash dereginshe, oqiǵa 2026 jyldyń naýryz aiynda bolǵan. Onyń sózinshe, sot-meditsinalyq saraptama qyzdyń jynystyq zorlyqqa ushyraǵanyn rastaǵan. Alaida keiin politsiia qylmystyq isti toqtatyp, bul sheshimdi aýdandyq prokýratýra maquldaǵan.
Anasy qyzynyń densaýlyq jaǵdaiyna bailanysty óz betinshe sanaly sheshim qabyldai almaitynyn aitady. Onyń sózinshe, 26 jastaǵy qyzdyń oilaý qabileti jas bala deńgeiinde: ol oqi almaidy, ýaqytty ajyrata almaidy jáne kúndelikti ómirde turaqty kútimdi qajet etedi. Soǵan qaramastan, tergeý barysynda bolǵan oqiǵa «ózara kelisimmen jasalǵan» degen qorytyndy jasalǵanyn jetkizdi.
Sondai-aq áiel kúdikti taraptyń isti toqtatý úshin aqsha usynǵanyn, biraq odan bas tartqanyn málimdedi. Ol kinálilerdiń zań aldynda jaýap berýin talap etip otyr.
Almaty qalalyq politsiia departamentiniń resmi ókili Saltanat Ázirbektiń aitýynsha, jábirlenýshi tarap keltirgen ýájder tergeý barysynda óz dálelin tappaǵan.
«Qazaqstan Respýblikasynyń Qylmystyq-protsestik zańnamasynyń talaptaryna sáikes, qylmystyq is qylmystyq quqyq buzýshylyq quramynyń bolmaýyna bailanysty toqtatyldy. Bul sheshimdi aýdandyq prokýratýra qadaǵalaýshy organ retinde maquldady», – dedi vedomstvo ókili.
Qazirgi tańda jábirlenýshi tarap Qazaqstan Respýblikasynyń Bas prokýrory Berik Asylovqa júginip, istiń qaita qaralyp, jan-jaqty ári ádil tergelýin qamtamasyz etýdi surap otyr.
