Almatyda er adam lift shahtasyna qulap mert boldy. Oqys oqiǵa «Alǵabas 6» shaǵyn aýdanyndaǵy №144 úide bolǵan. «Almatylift» JShS direktorynyń orynbasary Maksim Telitskii atalǵan oqiǵaǵa bailanysty túsinik berdi, dep habarlaidy "QazAqparat" tilshisi.
Turǵynnyń shahtaǵa qulaǵan sáti videoǵa túsip qalǵan.
Videoda er adam lift shaqyryp, der ýaqytynda kelmegen soń esikterin, túimelerin ura bastaǵan. Shydamy taýsylǵan soń shahta esiginiń astyńǵy tusynan teýip ashyp jibergen.
Azdaǵan ýaqyttan soń ol qarańǵy kabinaǵa kirmek bolyp, attaǵan kezde ary qarai qulap ketedi.
«Bizge sol kúni qońyraý tústi. Qyzmetkerler tekserýge barǵan kezde 5-qabattaǵy shahta esiginiń buzylǵanyn kórgen. Mehanik 1-qabattaǵy esikti ashqanda er adamnyń denesin tapqan. Sosyn úidegi videobaqylaý kameralaryndaǵy jazbany tekserip, oqiǵanyń qalai bolǵanyna kózimiz jetti. Turǵyn 5-qabatta lift shaqyrǵan. Ol kezde lift 6-qabatta turǵan. Tehnikalyq aqaýdyń kesirinen lift der ýaqytynda kele qoimaǵan. Soǵan ashýlanǵan ol esikti teýip kirgen», - dedi Maksim Telitskii.
Onyń aitýynsha, qazir oqiǵaǵa bailanysty tergeý amaldary júrip jatyr. Lift ázirshe jumys istep turǵan joq.
«Almatylift» ókiliniń aitýynsha, atalǵan lift 2015 jyly 22 shildede paidalanýǵa berilgen. Sońǵy ret 2018 jyly 13 shildede tekserilgen.
