Almatyda jyl basynan beri mopedter men samokatshylardyń qatysýymen 29 jol-kólik apaty tirkeldi, dep habarlaidy "Ult aqparat".
Politsiia departamentiniń málimetinshe, arnaiy taldaý negizinde qalada jol-kólik oqiǵalary jii bolatyn eń qaýipti 33 aimaq anyqtady.
«Vision Zero baǵdarlamasy aiasynda apattyq oqiǵalardy azaitý úshin qalalyq mobildilik basqarmasymen birge bul qaýipti aimaqtar jańartylady. Mysaly, siz baiqaǵanyńyzdai, keibir aimaqtar men qiylystarda erekshe qyzyl, sary, tipti vafli tańbalary qoldanylady. Bul júrgizýshilerdiń nazaryn aýdarý úshin jasaldy», – dedi Almaty qalalyq politsiia departamentiniń bastyǵy Qanat Taimerdenov.
Sonymen qatar, ol sońǵy jyldary qalamyzdyń joldarynda «balamaly kóliktiń» kóbeiip ketkendigin – mopedter men samokattar paida bolǵanyn atap ótti.
«Bizdiń baqylaýymyz boiynsha, qalada 2-den 2,5 myńǵa deiin elektrsamokatshylar men mopedshiler júredi. Onyń kópshiligi - taýar ne tamaq jetkizetin kýrerler. Jyl basynan beri «balamaly kóliktiń» qatysýymen 29 jol-kólik oqiǵasy boldy, onda bir adam qaza tapqan. Taǵy 29-y túrli dene jaraqatyn aldy», - deidi departament basshysy.
Onyń aitýynsha, jaqynda ákimdikpen jáne kýrerlik kompaniialardyń basshylarymen kezdesý ótken.
Nátijesinde jol erejelerin saqtaý, sondai-aq jetkizýshiler men olardyń kólik quraldarynyń esebin júrgizý boiynsha birqatar usynystar ázirlendi.
