Sońǵy aptada Almatyda Gabon men Vetnamnan oralǵan eki turǵynnan bezgek aýrýy anyqtaldy. Bul týraly Densaýlyq saqtaý ministrliginiń Ulttyq qoǵamdyq densaýlyq saqtaý ortalyǵy málimdedi, dep habarlaidy ult.kz.
Mamandardyń málimetinshe, jyl basynan beri Almatyda syrttan ákelingen bezgektiń tórt jaǵdaiy tirkelgen. Sońǵy naýqastardyń biri Gabonǵa issaparmen baryp kelgen bolsa, ekinshisi Vetnamda demalyp qaitqan.
Dárigerler naýqastardan bezgektiń eki túrin – tropikalyq jáne úsh kúndik formalaryn anyqtaǵan. Onyń ishinde tropikalyq bezgek asa qaýipti sanalady.
Mamandardyń aitýynsha, der kezinde emdelmegen jaǵdaida bul aýrý mi, baýyr, búirek jáne tynys alý júiesin zaqymdap, tipti ólimge ákelýi múmkin. Al úsh kúndik bezgek salystyrmaly túrde jeńil ótkenimen, onyń qozdyrǵyshy aǵzada uzaq ýaqyt saqtalyp, birneshe aidan keiin qaita qozýy yqtimal.
Qazirgi ýaqytta eki patsient te statsionarda em qabyldap jatyr. Diagnozdary zerthanalyq túrde rastalǵan.
Densaýlyq saqtaý salasynyń mamandary Almaty turǵyndaryna alańdaýǵa negiz joq ekenin atap ótti. Óitkeni bezgek turmystyq jolmen juqpaidy. Aýrý qol alysý, ortaq ydys paidalaný, tamaq, sý nemese aýa-tamshy arqyly taralmaidy. Infektsiia tek Anopheles tuqymdasyna jatatyn juqtyrǵan masanyń shaǵýy arqyly beriledi.
Ulttyq qoǵamdyq densaýlyq saqtaý ortalyǵy ásirese Vetnamǵa saparlaityn azamattarǵa saq bolýǵa keńes berdi. Eldegi epidemiologiialyq jaǵdai jaqsarǵanymen, keibir aýyldyq jáne ormandy óńirlerde bezgek juqtyrý qaýpi áli de saqtalyp otyr.
Sarapshylar shetelge shyqqanda repellentter qoldanýǵa, masaǵa qarsy torlar men fýmigatorlardy paidalanýǵa, jabyq kiim kiiýge jáne keshki ýaqytta ashyq jerde uzaq júrmeýge keńes beredi.
Sondai-aq shetelden oralǵannan keiin dene qyzýy kóterilip, qaltyraý, álsizdik nemese bas aýrýy baiqalsa, dereý dárigerge qaralyp, jaqynda shetelde bolǵanyńyzdy mindetti túrde habarlaý qajet.
