Premer-Ministr Asqar Mamin men Eýraziialyq ekonomikalyq komissiia alqasynyń tóraǵasy Mihail Miasnikovich Eýraziialyq úkimetaralyq keńestiń otyrysyn qorytyndylady, dep habarlaidy QazAqparat.
Premer-ministr Asqar Mamin Qazaqstan EAEO organdaryna tóraǵalyq etýdi 2021 jyldyń 1 qańtarynan bastap qabyldaǵanyn taǵy bir márte atap ótti.
Osyǵan orai, Memleket basshysy Qasym-Jomart Toqaev EAEO múshe-memleketterine negizgi basymdyqtar aitylǵan úndeý joldady.
«Qujat EAEO-nyń qurylǵan merzimi aralyǵynda qalyptasqan jańa múmkindikteri men ekonomikalyq-áleýmettik máselelerdi eskere otyryp jasaldy», - dedi A.Mamin.
EAEO organdaryna tóraǵalyq etý Qazaqstannyń kásiporyndaryna jańa serpin beredi. Yntymaqtastyqty arttyryp, ózara saýdadaǵy kedergilerdi joiyp, transshekaralyq kólik arteriiasynyń áleýetin tolyǵymen paidalanýǵa, keshendi tsifrlandyrý jáne syrtqy naryqqa shyǵý aiasyn keńeitedi.
«Eýraziialyq ekonomikalyq komissiia osy bastamalardy iske asyrý boiynsha tiisti is-sharalar josparyn bekitti. Onyń 15-i negizgi mindet, 84-i shara», - dedi Asqar Mamin.
Eýraziialyq Ekonomikalyq Komissiia alqasynyń tóraǵasy Mihail Miasnikovich jiynda EAEO elderiniń ekonomikasy úshin óte mańyzdy sheshimder qabyldanǵanyn aitty.
«Aldyn ala málimetter boiynsha, 2020 jyldyń sońynda jalpy ishki ónim birshama tómendeidi degen boljam bar. Naqty derekter keiinirek shyǵady. Ázirge ol 3,9% quraidy. Sonymen qatar, 2021 jyly jaǵdai jaqsarady. Odaq elderiniń ekonomikasy keminde 3,2% ósedi dep josparlap otyr. Bul úrdis jalǵasatyny sózsiz. Osylaisha, 2025 jylǵa deiingi damý strategiiasyndaǵy kózdelgen maqsat oryndalýy kerek», - dep qortyndylady Miasnikovich.
