Almatyda tanymal ánshi japa shekti. Belgisiz bir adam onyń kóligine otyryp alyp, zorlamaq bolǵan. Bul týraly áleýmettik jelidegi «NeMolchi.kz» paraqshasynda jariialandy.
Oqiǵa 11 jeltoqsan kúni keshke bolǵan. Ánshi Ýathan Zaqanqyzy kóligin otaldyryp, jylytyp otyrǵanda aldyńǵy oryndyqqa betperde kigen belgisiz bir adam otyryp alady. Ol ánshiniń alqymyna pyshaq taqap, «aiqailamaýdy, degenin isteýdi» buiyrypty. Kólikpen el arasynda «Tatarka» atalǵan aýdanǵa kelgen. Ol ánshiniń aýzyn tańyp, telefonyn aqtarǵan da, aqshasynyń bárin ózine aýdaryp alypty. Tipti Ýathan Zaqanqyzyn zorlamaq bolǵan. Ánshi aiaǵy aýyr ekenin aitqan soń ǵana qylmysker aram oiynan bas tartqan syńaily.
Bul týraly ánshiniń ózi bylai dep jazdy: «Kórer kúnim bar eken-aý!? Búgin shamamen túngi 23.30-00:00 kezinde ádettegidei bir keshti atqaryp, kóligime otyryp, qyzdyra bastadym. Almatynyń qaq ortasy.Kenet bir eńgezerdei erkektiń beinesin baiqadym.Betinde maska.Asyǵys kóliktiń artqy esigin ashty da, otyra salysymen aýzymdy basyp, týra moinyna pyshaǵyn taqaǵanda denem muzdap ketti.(Alǵashynda toidaǵy áriptesterdiń qaljyńy shyǵar dep oiladym). Olai bolmady. Bir kezde ol «Kólikti otaldyr, men aitqan baǵytta júre ber» dedi.
Qazaq eken.Kele jatyrmyz. Moinymda pyshaq! Almatynyń eleýsiz kóshelerine kirip, kózderden tasa boldyq! Bir saida turmyz. «Al endi qansha aqshań bar, shyǵar?!» dedi.
Sýmkany ózi alyp, kók tiyn qaldyrmai qaltasyna basty. Kartochkalarymdy da tekserip úlgerdi. Bir kezde qyl arqan moinyma bailanyp, dem jetpei jatqanyn sezine bastadym. Sansyz oilar! Dám-tuzymnyń taýsylǵany osy shyǵar dedim! Ómirim kóz aldymnan ótip jatyr. Qorqynyshty!
Bir kezde «men seni óltirmeimin dep sheshtim» dedi álgi qubyjyq.
Jótelip jatyrmyn. Qoish, ne kerek qalaǵan baǵytynda kóshelerdi kezdik. Attai 5 saǵat! Ol jasaǵan aram isterin syrasyn jutyp qoiyp, masairap aityp otyr.(Meniń eńbektenip tapqan aqshamdy jaratýda). Qolym bailaýly. Ábden jalyndym! Aldadym! Sońynda meni jiberetin bolyp sheshti. Bir jerden túsip qaldy. Sene alar emespin! Birden IIB ne bet aldym. Moinym, qolym tilingen. Túrim ot sóndirgendei. Shok! Beine baqylaý kameralaryna túspegendikten, qolynda qolǵap bolǵandyqtan eshteńe jasai almaityndaryn aitty.
Sóitip úige keldim. Qazaq baýyrlar-aý, sonsha bir-birimizge jaýǵa ainalǵanymyz ba? Qalai jibere saldy meni? Qandy qol qaraqshynyń qolynan qandai qudiret aman alyp qaldy? Sene alar emespin. Saq júrińizdershi! Baiqap júrińizder! Endi úiime kelgen soń, kóz jasyma eriksiz jol berdim», – dep dástúrli ánshi basynan ótken oqiǵany qynjyla jetkizdi».
Ánshi birden Almaly aýdandyq politsiiasyna aryz jazǵan. Politsiia úsh táýliktiń ishinde kúdiktini qolǵa túsirdi. Keiinnen kúdiktiniń qolynan taǵy bir qyzdyń japa shekkeni belgili boldy.
