Almatyda Birikken Ulttar Uiymy kúnin merekeleý qarsańynda atalmysh uiymnyń jańa ǵimaratynyń resmi tusaýkeseri ótedi, dep habarlaidy QazAqparat tilshisi.
«23 qazanda Almatyda Birikken Ulttar Uiymy kúnin merekeleý qarsańynda (24 qazandaǵy) atalmysh uiymnyń jańa ǵimaratynyń resmi tusaýkeserin josparlanǵan. Is-sharaǵa Almaty qalasynyń ákimi Baýyrjan Baibek, Syrtqy ister ministriniń orynbasary Erjan Ashyqbaev, sondai-aq Birikken Ulttar Uiymy aimaqtyq ofisteriniń joǵary ókilderi qatysady. IýNISEF-tiń Eýropa men Ortalyq Aziia elderi jónindegi aimaqtyq direktory Afshan Han, Dúniejúzilik densaýlyq saqtaý uiymynyń Eýropalyq biýrosynyń aimaqtyq direktory Jýjanna Iakab jáne Dúniejúzilik densaýlyq saqtaý uiymynyń Eýropalyq jelisiniń «Saý qalalary» merleriniń qatysýy kútilýde», - dedi Aibek Smadiiarov.
Onyń aitýynsha, Birikken Ulttar Uiymynyń jańa ǵimaraty BUU agenttikteriniń eń joǵary qaýipsizdik talaptaryn qanaǵattandyrý úshin salynǵan Almaty qalasynyń eń zamanaýi arhitektýralyq nysandarynyń biri bolyp tabylady.
«Ol Qazaqstandaǵy BUU agenttikteriniń úzdiksiz jumys isteýi úshin qajetti eń ozyq jabdyqtarmen jáne jihazdarmen jabdyqtalady. 2018 jyldyń sońynda - 2019 jyldyń basynda BUU agenttikteri jańa ǵimaratqa kóshýi múmkin», - dedi QR SIM resmi ókili.
