Foto: QR MAM
2025 jylǵy 12 mamyr kúni Astanada Halyqaralyq eriktiler jylyna daiyndyq jáne ótkizý jónindegi Ulttyq uiymdastyrý komitetiniń alǵashqy otyrysy ótti, dep habarlaidy Ult.kz.
Eske sala keteiik, Qazaqstan Respýblikasy Prezidenti Qasym-Jomart Toqaevtyń bastamasymen BUU Bas Assambleiasy 2026 jyldy Turaqty damý maqsattaryndaǵy Halyqaralyq volonterler jyly dep jariialaǵan bolatyn.
Atalǵan jiynǵa QR Mádeniet jáne aqparat ministri Aida Balaeva, BUU Eriktiler baǵdarlamasynyń atqarýshy úilestirýshisi Toily Qurbanov, memlekettik organdardyń, úkimettik emes uiymdardyń jáne volonterlik birlestikterdiń ókilderi qatysty.
Jiyn barysynda ministr Aida Balaeva elimizdegi volonterlik salasynda atqarylyp jatqan jumystar men otandastarymyzdyń jetistikteri jóninde baiandady.
"Qazaqstandyqtar álemniń túkpir-túkpirinde eriktilik jobalarǵa, sonyń ishinde BUU, IýNISEF siiaqty halyqaralyq uiymdardyń bastamalaryna belsendi atsalysyp keledi. Qazaqstan Úkimetiniń qoldaýymen 2020–2023 jyldar aralyǵynda toǵyz otandasymyz BUU-nyń túrli qurylymdarynda volonter retinde qyzmet atqardy. 2024 jyly jeti qazaqstandyq volonter BUU-nyń Keniia, Tailand jáne Túrkiiadaǵy agenttikterine jiberildi", – dedi Aida Balaeva.
Ulttyq uiymdastyrý komitetiniń otyrysynda volonterler qozǵalysyn damytýǵa jáne azamattyq belsendilikti arttyrýǵa baǵyttalǵan mańyzdy bastamalar men aldaǵy is-sharalar talqylandy. Spikerler sonymen qatar Eriktiler jylyna daiyndyq barysy týraly aityp, jańa jobalarǵa qatysty usynystaryn ortaǵa saldy.
BUU Eriktiler baǵdarlamasynyń atqarýshy úilestirýshisi Toily Qurbanov Qazaqstan tarapyna halyqaralyq eriktiler jylyn uiymdastyrýǵa belsendi kiriskeni úshin rizashylyǵyn bildirip, elimizdiń bul bastamadaǵy kóshbasshylyǵyn erekshe atap ótti.
"Sizderdiń bul saladaǵy belsendi qyzmetterińiz elimizdegi volonterlik mádenietiniń damýyna tyń serpin berip qana qoimai, Qazaqstandy azamattyq bastamalar salasyndaǵy mańyzdy halyqaralyq seriktes retinde tanyta bildi. Búgin Qazaqstan – BUU eriktiler baǵdarlamasyna qatysýshy el retinde óz pozitsiiasyn nyqtap, keleshekte basqa memlekettermen jumys barysynda biz Qazaqstannyń oń tájiribesin úlgi retinde keltiretin bolamyz", – dedi Toily Qurbanov.
Otyrysta taǵy bir mańyzdy jańalyq – Almaty qalasynda BUU Eriktiler qozǵalysynyń Ortalyq Aziiadaǵy sýbóńirlik keńsesi ashylatyny jariia etildi.
"Bizdiń ortaq mindetimiz – memlekettik qurylymdar, qoǵamdyq uiymdar, bilim berý mekemeleri men buqaralyq aqparat quraldary birlesip, volonterlikke qoldaý kórsetýdiń ornyqty júiesin qalyptastyrý. Bul baǵyttaǵy jumys barlyq taraptyń úilesimdi yntymaqtastyǵyna negizdelýi tiis", – dep qorytyndylady Aida Balaeva.
