Almaty qalasynyń ákimi Baqytjan Saǵyntaevtyń tapsyrmasyna sáikes qalalyq josparlaý jáne ýrbanistika basqarmasy burynǵy «Jemis konservi kombinaty» aýmaǵynda «Rams Kazakhstan» qurylys kompaniiasymen jumys júrgizdi. Nátijesinde, kompaniia usynǵan qurylys jobasyn ózgertýge mindetteldi, dep habarlaidy "Ult aqparat".
Qalalyq josparlaý jáne ýrbanistika basqarmasynyń málimetinshe, jobany qaita qaraý kezinde Almaty qalasy ákimdiginiń jáne qoǵam ókilderiniń usynystary eskeriledi. Sonymen, qurylys salýshy jobada áleýmettik nysandardyń, onyń ishinde bilim berý mekemeleri men mektepke deiingi bilim berý mekemeleriniń bolýyn qamtamasyz etýge mindetti. Sonymen qatar, mamandardyń usynystaryna sáikes ǵimarattardaǵy qabat sany ózgertiledi. Bul rette abattyndyrý men kógaldandyrýmen demalys aimaqtaryn qurýǵa erekshe nazar aýdarylatyn bolady.
Burynǵy kombinat aýmaǵyndaǵy qurylys jobasynyń áleýmettik mańyzdylyǵyn eskere otyryp, Almaty ákimdigi jańa qujatpen jumys jasaý úshin qalanyń jetekshi sáýletshileri - S.Fazylov, N.Hamitov, A.Aqpai jáne basqa da bedeldi qala qurylysshylaryn shaqyrdy.
Buǵan deiin habarlanǵandai, O.Jandosov, 94, 94/16, 94/8; Á. Kekilbaiuly k-si, 6; 20-liniia k-si, 39 («Jemis konservi kombinaty» aýdany) mekenjaiyndaǵy jer ýchaskesindegi qurylys jobasyn júzege asyrý toqtatyldy.
Halyqqa qyzmet kórsetý nysandary bar kóppáterli turǵyn úi keshenin salý úshin jobalaý aldyndaǵy qujattama keri qaitaryldy.
Sonymen qatar, osy jyldyń 26 sáýirine josparlanǵan jobanyń birinshi nusqasy boiynsha qorshaǵan ortaǵa áserdi baǵalaý boiynsha qoǵamdyq tyńdaýlar toqtatyldy.
Almaty qalasynyń kórsetilgen aimaǵynda qurylysqa jol berilmeidi. Ózgertilgen jobany júzege asyrý múmkindigi tek kópshiliktiń talqylaýyna, qala turǵyndarynyń qoldaýyna ie bolǵannan keiin ǵana qarastyrylady.
