Almaty ákimi Baqytjan Saǵyntaev Alataý aýdanyna jumys sapary kezinde qoǵamdyq keńistikterdiń abattandyrylý barysymen jáne infraqurylymdyq máselelerdiń sheshilýimen tanysty, dep habarlaidy "Ult aqparat".
Baqytjan Saǵyntaev iesiz bos jatqan jerlerdiń ornynda paida bolǵan birqatar qoǵamdyq keńistikterde boldy. Jumyspen qamtýdyń jol kartasy aiasynda «Aqbulaq», «Shapaǵat», «Qarasý» yqshamaýdandarynda skverler salynyp, jóndelgen bolatyn. Sonymen qatar, Móńke bi kóshesindegi vorkaýt alań iske qosyldy.
«Sporttyq jáne balalar aimaǵy búldirshinge toly bolsa, alleiada aqsaqaldar serýendep júr. Turǵyn úilerdiń mańaiy qańyrap bos turdy degenge sený qiyn. Mundaǵy turǵyndarmen áńgimelesip, jańa qoǵamdyq keńistikterdi kútip ustaýǵa shaqyrdym», - dep jazdy B. Saǵyntaev Instagram paraqshasynda.
Sondai-aq, qala ákimi 78 gektar jerge áleýmettik belsendiler men eko-belsendilerdiń kúshimen jyl basynda salynǵan qaraǵaily ormandy abattandyrý barysymen tanysty.
Jalpy, Alataý aýdanynda jasyl jelekterdiń aýmaǵy eki esege jýyq kóbeiedi, jasyl jelekter sany 355 myńǵa jetedi, onyń 176 myńy biyl Jasyl Almaty baǵdarlamasy aiasynda otyrǵyzylady.
Sonymen qatar, B. Saǵyntaev jol salý jáne jóndeý ýchaskelerin qarap shyqty. Sonymen qatar «Uljan» jáne «Ójet» yqshamaýdandarynda injenerlik jeliler men syrtqy jaryqtandyrý júiesin salý jumystarynyń barysymen tanysty.
«Baqytty otbasy» aýdandyq kópbalaly analardy áleýmettik qoldaý ortalyǵynda ákimge jyl ishinde júrgizilgen ózgeristerdiń nátijeleri tanystyryldy. Onyń nátijesi kóp balaly analardyń belsendi ómirge aralasýy boldy. Jyl basynan beri 25 myń áiel «Isker ana» baǵdarlamasy boiynsha negizgi treningter men kýrstardan ótti. 537 áiel «Biznes Bastaý» baǵdarlamasy boiynsha oqydy, onyń 300-i grant alyp, ár túrli baǵytta óz kásibin ashty.
