Foto: Almaty ákimdigi
Almatyda biyl kóppáterli turǵyn úilerdiń basqarmasyna 300-dei tekseris júrgizý josparlanyp otyr. Turǵyn úilerdi kúrdeli jóndeý men jedelsatylardy aýystyrý jumysy da jalǵasady. Óńirlik kommýnikatsiialar qyzmetinde Almaty qalasy kommýnaldyq infraqurylym jáne turǵyn úi inspektsiiasy basqarmasy basshysynyń orynbasary Jandos Qaiyrhanov osylai dedi.
Onyń aitýynsha, qazir qaladaǵy 9,6 myń kóppáterli turǵyn úidi 2,5 myńnan astam nysan — MIB, PIK men basqarýshy kompaniialar basqarady eken. Byltyr 265 tekseris júrgizilip, 66 ákimshilik hattama toltyrylyp, 37 nysan 10 mln teńgeden astam somaǵa jaýapqa tartylǵan. Biyldyń ózinde 151 tekseris bastalyp ketipti.
«Turǵyn úidiń tozýyna bailanysty kóp ótinish tústi. Ýaqytyly kúrdeli jóndeý jasamaǵan, qurylym men injenerlik júieler eskirgen, osynyń bári ainalyp kelip úlken máselege bolyp otyr», — deidi Jandos Qaiyrhanov.
Soǵan qaramastan qalada turǵyn úi-kommýnaldyq sharýashylyqty jańǵyrtyp jatyr. 2011 jyldan beri 1,3 myńnan astam úige kúrdeli jóndeý júrgizip, 2,3 myńnan astam jedelsaty aýysqan. Biyl taǵy 100 úidi jóndep, 45 jedelsaty aýystyrmaq. Bul 300 jańa jumys ornyn ashýǵa múmkindik beredi.
Turǵyn úilerdi basqarý salasyndaǵy zańnamalyq ózgeriske de erekshe nazar aýdaryldy. Atap aitqanda, «qarapaiym seriktestik» nysany alynyp tastaldy, endi eki negizgi model qarastyrylǵan — MIB men tikelei birlesken basqarý. Sondai-aq MIB tóraǵasynyń ókilettik merzimi úsh jylǵa deiin uzartylyp, basqarýshy kompaniialardy tartý múmkindigi keńeitildi.
Budan bólek, turǵyndardyń jinalysyn ótkizýdiń kúndizgi jáne syrttai (onyń ishinde onlain) deitin jańa formaty engizildi. Sonymen qatar turǵyn úi inspektsiiasynyń mindetine jylytý maýsymyna daiyndyq pen órt qaýipsizdigi júieleriniń jai-kúiin baqylaý jaǵy da kirip otyr.
Sondai-aq, qoldanystaǵy PIK-ter biyl shilde aiyna deiin qaita tirkeýden ótýge tiis. Ol úshin HQKO arqyly ótinish, jinalys hattamasy men tirkeý alymynyń tólengeni týraly qujat tapsyrý kerek. Belgilengen merzimde talap oryndalmaǵan jaǵdaida kooperativterdi májbúrli túrde taratý rásimi qarastyrylǵan. Sonymen qatar zańda ýaqytsha basqarýshy kompaniialar institýty kózdelgen. Bul jańa úilerge de, sondai-aq turǵyndary basqarý nysanyn áli tańdamaǵan nysandarǵa da qatysty.
Bul bastama turǵyn úi qoryn basqarýdyń ashyqtyǵy men tiimdiligin arttyryp, turǵyndardyń, basqarýshy uiymdar men memlekettik organdar arasyndaǵy ózara bailanys mádenietin qalyptastyrýǵa baǵyttalǵan.
