Almatyda bir jylda 14 myńnan astam onkologiialyq naýqas statsionarlyq em qabyldady, dep habarlaidy "Ult aqparat".
Almaty qalasynda onkologiialyq naýqastardyń sany 2019 jylmen salystyrǵanda 1733-ke artty.
Ótken jyly bul kórsetkish 14546 naýqasty qurasa, 2019 jyly 12813 patsient emdeldi.
2020 jyly qaterli isiktiń eń kóp taralǵan túri – sút bezi, ishek pen asqazan qaterli isikteri.
«Almaty onkologiia ortalyǵynyń hirýrgtary aptasyna 45-55 ota jasaidy. Máselen, ótken jyly 2514 ota boldy. Olardyń ishinde keýde qýysy, ish, onkoýrologiia, bas jáne moiyn isikterine arnalǵan otalar bar. Olardyń 40% invazivti, iaǵni laparoskopiialyq jolmen jasalatyn otalar», - deidi onkohirýrgiia bóliminiń meńgerýshisi Nurlan Baltaev.
Búginde almatylyq mamandar isikti joiý otalaryn jasap qana qoimai, anatomiialyq aqaýlardy plastikalyq jolmen joiýdy júzege asyryp júr.
Máselen, byltyr tildiń túbiriniń qaterli isigi diagnozy qoiylǵan naýqasqa ota ústelinde anatomiialyq aqaýlardy plastikalyq jolmen joia otyryp, kúrdeli ota jasaldy.
«Otalaý binokýliarlyq optika astynda 7 saǵatqa sozyldy. Kólemi 20 sm bolǵan isikti dárigerler terimen birge alyp tastady. Ota sátti ótip, naýqas qazirgi ýaqytta t sóilep, tamaq ishe alady», - deidi dáriger.
