Almatyda bir otbasyndaǵy jeti adam iis gazynan ýlanyp qaldy, dep habarlaidy Sputnik Qazaqstan qalanyń tótenshe jaǵdailar qyzmetine silteme jasap.
Oqiǵa 22 aqpanda tańerteń Shuǵyla shaǵyn aýdanynda bolǵan. Tótenshe habar qutqarýshylarǵa 06.30 kezinde jetipti: bir otbasyndaǵy 7 adam, olardyń beseýi – bala, iis gazynan ýlanyp, aýrýhanaǵa jóneltilgen.
Oqiǵa oryna kelgen Naýryzbai aýdany tótenshe jaǵdailar bóliminiń qyzmetkerleri anyqtaǵandai, ýlanýǵa qatty otynmen janatyn pesh sebep bolǵan, eresekter peshtiń esigin qymtap jabýdy umytyp ketipti.
"Budan buryn jeke sektordy aralaý kezinde aýdandyq tótenshe jaǵdailar bóliminiń qyzmetkerleri bul otbasyǵa jylý maýsymyndaǵy qaýipsizdik erejelerin túsindirgen bolatyn", - dep habarlady tótenshe jaǵdailar departamenti.
Qoǵamdyq densaýlyq saqtaý basqarmasy bergen málimetke súiensek, qazir naýqastardyń ómirine qaýip tónip turǵan joq. Ýlanýǵa qarsy em qabyldap jatyr. Jaqyn arada aýrýhanadan shyǵarylmaq.
Aita ketsek, jylý maýsymy bastalǵaly beri TJD qyzmetkerleri jeke sektordyń 145 myń úiin aralap, 10 myńnan astam adamdy qamtyǵan 542 jiyn ótkizipti. TJD bastamasymen bul kezeńde úilerdi aralaý kezinde turmysy nashar otbasylardyń úiine 136 dana iis gazynan habar beretin qurylǵy ornatylǵan. Bul jumys jylý maýsymy bitkenge deiin jalǵasady.
Qutqarýshylar turǵyndarǵa qatty otynmen janatyn peshti qoldanǵanda asa muqiiat bolyp, qaýipsizdik erejesin saqtaý qajettigin eskertti.
