Almatyda balalarǵa qol kótergen №37 balabaqsha tárbieshisi jumysynan shyǵaryldy. Balabaqsha meńgerýshisine sógis jariialandy, dep habarlaidy QazAqparat tilshisi.
2 mamyrda bolǵan oqiǵanyń videosy áleýmettik jelige tarap ketti.
Beinekadrda eresek áiel 3-4 jas shamasyndaǵy balany jatyn bólmeden súirep shyǵyp ekinshi bólmege aparyp aiaq kiimmen urǵany túsip qalǵan. Artynan tósegine jatyp uiyqtai qoimaǵan ekinshi balany da uryp jatqany kórinedi.
Taiaq jegen balanyń ata-anasy ishki kamera jazbalaryn tekserý kezinde bul sumdyq jaǵdaidy kórip, narazylyq týdyrdy. Kadr syrtynda tárbieshiniń jalynyp, politsiia shaqyrmaýyn surap jylaǵan daýsy estiledi.
Atalǵan oqiǵaǵa bailanysty qalalyq Bilim berý basqarmasy túsinik berdi.
«Bul oqiǵa 2 mamyrda kishi balalar tobynda bolǵan. №37 balabaqshanyń tárbieshisi pedagogikalyq tárbiege jat qylyq kórsetken. Anasy balasynyń kógergen betin kórip, 3 mamyrda balabaqsha meńgerýshisine shaǵym aitqan. Balabaqsha meńgerýshisi men anasy ishki kamera jazbalaryn qarap shyqqan. Kadrlardyń birinen tárbieshiniń qol kótergeni anyq boldy», - dedi qalalyq Bilim berý basqarmasynan.
Balabaqsha tárbieshisi QR Eńbek kodeksiniń 52-babynyń 14 pýnktimen jumystan bosatyldy. Sondai-aq qylmystyq jaýapkershilikke tartyldy.
Qalalyq Politsiia departamentiniń habarlaýynsha, tergeý jumystarymen Alataý aýdandyq politsiia basqarmasy ainalysyp jatyr.
«Politsiiaǵa balanyń anasy ótken túni aryzdandy. Bul derek QR QK 140 babynyń 2-bólimimen sotqa deiingi biryńǵai tergeý reestrine tirkeldi. 35 jastaǵy tárbieshi qylmystyq jaýapkershilikke tartyldy. Jaqyn arada is materialdary sotqa joldanady», - dedi qalalyq PD resmi ókili Saltanat Ázirbek.
Sonymen qatar, baqshada atalǵan derekke bailanysty óndiristik jiyn ótti.
Al balabaqsha meńgerýshisine ujymnyń tárbitin qadaǵalaýdy qoldan shyǵaryp alǵany úshin sógis jariialandy.
Mektepke deiingi bilim berý oshaǵynyń jumysy qalalyq Bilim berý basqarmasynyń qatań baqylaýyna alyndy.
