Almatyda balalardy urǵan balabaqsha tárbieshisine úkim shyǵaryldy, dep habarlaidy QazAqparat tilshisi.
Kámeletke tolmaǵandar isi boiynsha mamandandyrylǵan aýdanaralyq sotta balalardy urǵan balabaqsha tárbieshisi Gúljan Ákimbaevaǵa qatysty úkim shyǵaryldy. Sottyń úkimimen áiel QR QK 140-baby 2-bóligi «Kámeletke tolmaǵan adamdy tárbieleý jónindegi mindetterdi oryndamaý» boiynsha kináli dep tanylyp, 60AEK kóleminde aiyppul salyndy jáne úsh jylǵa deiin kámeletke tolmaǵandarmen jumys isteýge tyiym salyndy. Sondai-aq, sot aiyptalýshyny Zardap shegýshilerdiń ótemaqy qoryna 5 AEK tóleýge jáne 100 000 teńge kóleminde moraldyq zalal óteýge mindettedi.
Sarapshynyń qorytyndysyna sáikes, Gúljan Ákimbaeva balalardyń denesin jeńil jaraqattaǵan. Áiel óziniń kinásin tolyqtai moiyndap, istegen isine ókinetinin aitty. Sot úkimdi shyǵararda onyń kinásiniń moiyndaýy men ókinýin, sottalýshynyń kámeletke tolmaǵan eki balasynyń baryn esepke aldy.
Oqiǵa 2 mamyrda Almaty qalasyndaǵy «№37 balalar baqshasynda» bolǵan. Video Instagram-daǵy paraqshalardyń birinde jariialanǵan. Kadrda áieldiń kereýette jatqan balaǵa baryp, ony tósekten julqyp turǵyzyp, basqa bólmege alyp ketkeni anyq kóringen. Keiin ol bul áreketin basqa balaǵa da jasaidy. Ol oinaityn bólmede balalardy birneshe ret uryp-soǵady. Keiinirek politsiiada tárbieshiniń qylmystyq jaýapqa tartylǵany habarlandy. Balabaqshanyń meńgerýshisi qyzmetinen ketti. Úkim zańdy kúshine engen joq.
