Almatyda «Aýtizmdi jeńemiz» áleýmettik jobasy aiasynda inkliýzivti fýtbol komandalary arasynda match ótti, dep habarlaidy QazAqparat.
Aýtizmge shaldyqqan balalar ózara dop tebýden baq synasty. «Álemde aýtizmdi jeńý óte qiyn. Biraq biz óz balalarymyzdyń ómirin kórsete otyryp, ony jeńýge bolatynyn kórsetkimiz keledi. Bul jaqyndarynyń mahabbaty men qoldaýynyń arqasynda ǵana múmkin bolmaq», - dedi «DOM» qoǵamdyq qorynyń direktory Arýjan Sain.
«Aýtizmdi jeńemiz» jobasy óz jumysyn 2013 jyly Aýtizmi bar balalar ata-analarynyń Almaty qalalyq qaýymdastyǵy janynda bastady. Osy ýaqytqa deiin 1500 balaǵa kómek kórsetildi. Joba aýtistikalyq spektri buzylǵan balalary bar qazaqstandyq otbasylardy qoldaýǵa baǵyttalǵan. Almatylyq Madina Kenjeǵulovanyń uly Dias 11 jasta. Bala aýtizmge shaldyqqan. Ol jyl boiy fýtbolmen shuǵyldanady. Dias buǵan deiin shetelde em alyp júrgen. Qazir em-dom sharalary Qazaqstanda da qoljetimdi.
«Men jobaǵa balamnyń qajettiligi úshin keldim. Osy jobanyń arqasynda kóp jetistikke jettik. Onyń aldynda balam sóilei almaityn, oiyn jetkize almaityn. Qazir 3-4 tańbaly sandardy sanaidy, kóbeitedi, bóledi. Diktant jaza alady. Kún saiyn logopedtermen, defektologtarmen sabaq ótemiz», - dedi Madina.
«Aýtizmdi jeńemiz» jobasy balalardy áleýmettik ortada beiimdeýge baǵyttalǵan. Qazir munda 80 bala ońaltý sharalarynan ótip jatyr.
«DOM» qoǵamdyq qory tuńǵysh ret fýtbol sektsiiasyn ashty. «Sport sektsiiasyn ashýdaǵy maqsat - aýtizmi bar balalardyń komandalyq oinaý qabiletin arttyrý. Osyǵan deiin «aýtizm» diagnozy bar balalar komandada oinai almaidy degen pikir bolatyn. Bizdiń sport sektsiiamyz munyń olai emes ekendigin kórsetti», - dedi Arýjan Sain.
Autism Speaks halyqaralyq uiymynyń málimetinshe, AQSh-ta «aýtizm» diagnozy 59 balanyń ishinde 1 balaǵa qoiylady. «Asyl Miras» qory habarlaǵandai, 2018 jyly Qazaqstanda bul diagnoz 3920 adamǵa qoiylǵan.
