Almaty qalalyq josparlaý jáne ýrbanistika basqarmasynda Muhtar Áýezov atyndaǵy Qazaq memlekettik akademiialyq drama teatrynyń ǵimaratyn qaita qalpyna keltirý máseleleri talqylandy, dep habarlaidy "Ult aqparat".
«Sáýletshi Berik Moljigittiń jobasy talqylandy, onda negizgi fasadtaǵy mármár plitalardy áinek vitrajdarymen almastyrý arqyly jańartý usynyldy. Sáýletshiniń aitýynsha, ashyq vitrajdar teatrdyń ishki álemin qala ortasymen bailanystyrýǵa múmkindik beredi. Vitrajdardyń artynda teatr galereiasy teatrǵa kelgen almatylyqtardyń bos ýaqytyn ótkizetin jańa qoǵamdyq demalys orny retinde jumys isteidi», delingen Qalalyq josparlaý jáne ýrbanistika basqarmasynyń jelidegi paraqshasyndaǵy jazbada.
Sonymen qatar, jobanyń alǵashqy avtory Oraz Baimyrzaev teatr ǵimaratynyń boi kótergenine jaqynda 50 jyl tolatynyn atap ótti.
«Usynylǵan nusqanyń konstrýktivti kemshilikteri de bar. Vitrajǵa aýystyrylatyn sektsiia uzyndyǵy 4,8 metr syrtqy fasadtyń konsolin kóterip tur. Meniń oiymsha, klassikalyq teatrdyń ǵimaraty vitrajsyz bolýy qajet, óitkeni árqashan teatrdaǵy qimyl-qubylys qupiiasy saqtalý kerek», - dedi ol.
Almaty qalalyq josparlaý jáne ýrbanistika basqarmasynyń basshysy Almashan Ahmetjanov usynylǵan vitrajdary bar nusqa respýblikalyq mańyzy bar tarihi eskertkishtiń kelbetin buzatynyn aitty.
«Joǵary tehnologiialyq materialdardy qoldanyp, ǵimarattyń qasbetin bastapqy kelbetinde saqtaý kerek. Qasbetti qalpyna keltirýdiń basqa nusqalaryn da qarastyrý qajet», - dedi Almashan Ahmetjanov.
Aita ketý kerek, 1 qarashada teatrdyń jańa kelbetine qatysty alǵashqy usynystan Qalalyq josparlaý jáne ýrbanistika basqarmasy bas tartty, Mundai sheshim teatrdyń tarihi beinesin saqtaý qajettigine bailanysty qabyldandy.
«Teatr ǵimaratynyń sáýlettik kelbeti tutastai alǵanda saqtalýy tiis. Osyǵan bailanysty qoldanylatyn materialdardyń kúndiz jáne túndegi kórinisin kórsete otyryp (3D túrlerin), túrli-tústi sheshimde qasbetterdiń basqa nusqasyn usyný qajet», - dep málim etti basqarmadaǵylar.
Aita keteiik, Almaty qalalyq josparlaý jáne ýrbanistika basqarmasy teatrdy qaita jańǵyrtý jobasyn ázirleýshimen jumys kezdesýin jalǵastyrady. Aýmaqty abattandyrý máseleleri jeke kezdesýde qabyldanatyn bolady, onyń qorytyndysy basqarmanyń resmi saitynda jariialanady.
