Almatyda «Astra Consulting agensy» JShS qyzmeti qarjylyq piramida retinde tanyldy, dep habarlaidy "Ult aqparat".
Almaty qalalyq Politsiia departamentiniń málimetinshe, atalǵan kompaniianyń basshylyǵy men qyzmetkerlerine qatysty alǵashqy aryz politsiiaǵa 2019 jyldyń jeltoqsan aiynda túsken. Búgingi kúni zardap shekkenderdiń resmi sany – 124 adam.
«Azamattardy aqsha salýǵa tartý jáne ai saiynǵy devidentterdi tóleýge ýáde berý boiynsha birqatar alaiaqtyq is-áreketterdi jasady degen kúdikpen kompaniianyń alty qyzmetkeri ustalyp, qamaýǵa alyndy. Onyń jetekshisi halyqaralyq izdeýge jariialandy. Kúdiktilerdiń is-áreketteri QR QK-niń 217-baby 3-bóligi (Qarjylyq piramida) boiynsha kvalifikatsiialanǵan. 124 salymshyǵa keltirilgen materialdyq shyǵynnyń jalpy somasy 6,2 mln teńge», – dedi Almaty qalalyq Politsiia departamenti bastyǵynyń orynbasary Rústem Ábdrahmanov.
Onyń aitýynsha, sotqa deiingi tergep-tekserýdi PD tergeý basqarmasy júrgizedi.
«Zańsyz áreketterdiń basqa qatysýshylaryn, sondai-aq jábirlenýshilerdi anyqtaý jumystary jalǵasýda. Osyǵan bailanysty biz joǵaryda atalǵan kompaniia ókilderiniń qylmystyq áreketterinen zardap shekken azamattardy tergeýshige myna telefon nómiri 8-701-732-86-54 arqyly bailanysýǵa nemese Almaty qalasy, Masanchi kóshesi 55 úige kelip resmi ótinish jazýǵa shaqyramyz», – dedi Rústem Ábdrahmanov.
