Almaty ákimdigi Akýsherlik jáne ginekologiia ǵylymi ortalyǵy janyndaǵy aǵashtardy kesýge ruqsat bergen joq. Qazir osy derek boiynsha tekserý bastaldy, dep habarlaidy "Ult aqparat".
Aita keteiik, birqatar buqaralyq aqparat quraldarynda Akýsherlik jáne ginekologiia ǵylymi ortalyǵy janyndaǵy jasyl jelektiń kesilgeni týraly aqparat tarady.
Almaty qalalyq jasyl ekonomika basqarmasynyń málimetinshe, vedomstvoǵa aǵash kesýge ruqsat suraǵan ótinish túsken joq.
«Jasyl alqaptardy kútý men qorǵaýdyń tiptik erejeleri jáne qalalar men eldi meken aýmaǵyn abattandyrý erejelerine sáikes, aǵash kesýge ruqsatty jeke turǵyn úi qurylysyn, jeke qosalqy nysan salatyndardan ózgerlerdiń bári bere alady», - dep habarlady basqarmadan.
Qalalyq josparlaý jáne ýrbanistika basqarmasynyń dereginshe, ýchaskeniń maqsatty baǵyty mynadai: halyqqa qyzmet kórsetý nysandary bar kópfýnktsionaldy turǵyn keshenin salý.
Atalǵan nysan jeke menshik quqyǵy negizinde zańdy tulǵaniki.
Memlekettik qyzmet kórsetý aiasynda menshik iesine halyqqa qyzmet kórsetetin nysandary bar kópqabatty turǵyn úi kesheniniń jobalaý aldyndaǵy qujattar (sáýlet-josparlaý tapsyrmasy jáne kelisilgen eskiz jobasy) berilgen.
Tekserý júrgizý úshin is materialdary kelgen zalaldyń aýqymyna bailanysty kinálilerdi anyqtaý jáne qoldanystaǵy ákimshilik nemese qylmystyq zańnamaǵa sáikes jaýapkershilikke tartý úshin Almatynyń politsiia departamentine jiberiledi.
