Almatyda aty ańyzǵa ainalǵan akter Quman Tastanbekovpen qoshtasý rásimi ótti, - dep habarlaidy "Ult aqparat".
Qoshtasý rásimi Muhtar Áýezov atyndaǵy Qazaq memlekettik akademiialyq drama teatrynda ótti.
Quman Tastanbekovpen qoshtasý rásimine júzdegen adam keldi. Olardyń arasynda: QR mádeniet jáne sport ministri Arystanbek Muhamediuly, Almaty ákimi Baýyrjan Baibek, halyq ártisi Asanáli Áshimov jáne taǵy basqalary boldy.
Eske sala keteiik, "Qyz Jibek" filminde Tólegen rólin somdaǵan Quman Tastanbekov 17 jeltoqsanda dúnieden ótken edi.
Quman Nurmaǵanuly Tastanbekov 1945 jyly 10 naýryzda Almaty oblysy Sarqant aýdany Ekiasha aýylynda dúniege kelgen. Akter, Qazaqstannyń halyq ártisi (1993 j.).
1969 jyly Almaty memlekettik óner institýtynyń (qazirgi Qazaq ulttyq konservatoriiasy) akterlik fakýltetin (ustazy – professor H.Bókeeva) bitirgen soń, Qazaqtyń memlekettik akademiialyq drama teatrynyń quramyna qabyldanǵan. Onyń alǵash oinaǵan róli – “Qyz Jibek” filmindegi Tólegen (1970 j.). Budan keiin ol “Qys – mazasyz maýsym”, “Aǵam meniń”, “Erekshe kún”, “Aqqýlar ushyp keledi”, “Mahabbat jańǵyryǵy”, “Aǵama arnalǵan qalyńdyq”, “Qarasha qazdar qaitqanda”, “Provintsiialyq hikaia”, “Alań sheti”, “Órnek”, t.b. filmderine túsken.
Ol teatr sahnasynda Qasym, Qulbek (Sh.Aitmatov, “Ana – Jer-ana” men “Aq kemesi”), Álibek, Narsha, Abyz (M.Áýezov, “Aiman – Sholpan”, “Qaragóz” ben “Eńlik – Kebek”), Táńirbergen (Á.Nurpeiisov, “Qan men ter”), Jan (O.Bókeev, “Qulynym meniń”, Qazaqstan Lenin komsomoly syil., 1976), Aidar (Áýezov pen L.S. Sobolev, “Abai”), Mazdaq (M.Shahanov, “Senim patshalyǵy”), Orest (L.Diýrko, “Elektra, súiiktim meniń”), Floridor (F.Erve, “Túlki bikesh”), Farhad (Nazym Hikmet, “Farhad – Shyryn”) t.b. sekildi ár alýan róldi somdaǵan.
