Almatyda jazýshy Ábish Kekilbaevtyń «Shyńyraý» povesi negizinde túsirilgen attas filmniń resmi tanystyrylymy ótti, dep habarlaidy QazAqparat.
«Film 10-nan astam halyqaralyq kinofestivaldiń konkýrstyq baǵdarlamasyna qatysyp baǵasyn alǵanmen, eldegi premerasy pandemiiaǵa bailanysty keiinge shegerilgen edi. Sonyń reti búgin kelip otyr. Sharaǵa qarjylai demeýshilik kórsetken «Qazaqstan Kommertsiia» aktsionerlik qoǵamy direktorlar keńesiniń tóraǵasy, belgili metsenat, memleket jáne qoǵam qairatkeri Jaýǵashty Jolanuly Nabievke alǵys aitamyz», - deidi jazýshynyń nemeresi Abyl Kekilbaev.
Filmniń stsenariin rejisser Jańabek Jetirýovtyń ózi jazǵanyn aita ketý kerek.
Negizi povest 1982 jyly jaryq kórgen. Sol tustan 2009 jylǵa deiin birneshe kino mamany ony ekranǵa shyǵarýǵa niettengenimen, sáti túspegen kórinedi.
«2009 jyly «Qazaqfilm» kinostýdiiasynyń sol kezdegi prezidenti Ermek Amanshaevtyń uiytqy bolýymen Ábish atamnyń povesin ekranǵa shyǵarý boiynsha naqty jumys bastaldy. Bul jumys Jańabek Jetirýovqa tapsyryldy. Ol kisi povest avtorymen birneshe ret kezdesip, stsenaridiń alǵashqy nusqasyn ózine maquldatqan bolatyn. Ókinishke qarai, atamyz filmdi túsirý jumystary bastalǵanyn kórmei ketti. 2019 jyly Astanada «Eýraziia» Halyqaralyq kinofestivaliniń baǵdarlamasynda «Shyńyraý» filmi alǵash ret kórsetildi», - deidi Ábish Kekilbaevtyń nemeresi.
Filmdegi siýjet jelisi Ústirt jazyǵynda qudyq qazýdy kásip etken eki qarapaiym qudyqshynyń arasyndaǵy básekege qurylǵan.
Eldiń batasyn alýdy maqsat tutqan baiyrǵy kásipti básekeniń kózine ainaldyrǵan Eńsep aqyry sol baqtalastyqtyń qurbanyna ainalady.
«Film adamnyń óz maqsatyna jetý úshin ómir baqi eńbektenetinin, biraq ol óz múmkindiginiń qai jerde sarqylatynyn sezbei, shekten asyp ketip, óz armanynyń qurbanyna ainalatynyn kórsetedi», - deidi Abyl Kekilbaev.
Bul film 2019 jyldan beri 10-nan astam halyqaralyq fectivalge qatysqan.
Sonyń eń negizgileri - 2019 jyly Iranda ótken 37-shi «Fadjr» halyqaralyq kinofestivaliniń, Qytaidyń Siamen qalasynda ótken «Altyn átesh jáne júz gúl» halyqaralyq kinofestivaliniń, Úndi elinde ótken 24-shi «Kerala» halyqaralyq kinofestivaliniń Bolgariianyń Sofiia qalasynda ótken 13-shi «MENAR» halyqaralyq kinofestivaliniń jáne Sankt-Peterbýrgte ótken 27-shi «Ádebiet jáne kino» atty halyqaralyq kinofestivaldiń negizgi konkýrstyq baǵdarlamasynda usynyldy.
Sondai-aq, AQSh-tyń Arizona qalasynda uiymdastyrylǵan Aziialyq filmderdiń halyqaralyq kinofestivalinde, Úndi memleketiniń birneshe qalalarynda kórsetilgen.
Týyndynyń akterlik quramyna kelsek, negizgi rólderdi Qazaqstannyń eńbek sińirgen qairatkeri Aldabek Shalbaev, belgili teatr jáne kino akteri Muhamedjan Myrzakeev, «Daryn» jastar syilyǵynyń iegeri Asylhan Tólepov, Maqsat Sábitov, Qanat Qurymbaev, Aijan Jańabekqyzy, Anar Beisenbina siiaqty ártister somdaǵan.
