Almatyda politsiia qyzmetkerleri 826 kg sertifikattalmaǵan pirotehnikalyq ónim tárkiledi.
Bul týraly qalalyq Tótenshe jaǵdailar departamenti basshysynyń mindetin atqarýshy Erlan Álibekov onlain brifing barysynda aitty.
«Jańa jyl merekesi kezinde órt qaýipsizdigin qamtamasyz etý maqsatynda Politsiia departamentimen birlesip, pirotehnikalyq ónimderdi zańsyz satý oryndaryn anyqtaý úshin 2020 jylǵy 15 jeltoqsannan 2021 jylǵy 7 qańtarǵa deiingi aralyqta birlesken sharalar ótkizý Jospary jasalyp, bekitildi. Bul jospardy iske asyrý sheńberinde 40 shara ótkizilip, politsiia qyzmetkerleri 826 kg sertifikattalmaǵan pirotehnikalyq ónim tárkiledi.
Politsiia qyzmetkerleri QR Ákimshilik quqyq buzýshylyq týraly kodeksiniń 196 babynyń 1-bólimi boiynsha 8 ákimshilik hattama toltyrdy. Qazaqstan Respýblikasynyń zańnamasynda tyiym salynǵan nemese shektelgen taýarlarmen jáne ózge zattarmen saýda jasaǵany úshin 25 ailyq eseptik kórsetkish boiynsha aiyppul qarastyrylǵan. Turǵyndar arasynda pirotehnikany durys qoldaný týraly 2000-nan astam jadynama, broshiýra men eskertpe taratyldy», - dedi Erlan Álibekov.
Onyń aitýynsha, Almaty qalasynda jyl saiyn jańa jyl merekelerinde 10-nan 15-ke deiin órt bolady. Al órttiń 30 paiyzy pirotehnikalyq buiymdardy qoldaný saldarynan bolǵan. Sońǵy 5 jylda bolǵan 76 órttiń 16-sy pirotehnikany qoldanýdan boldy.
«Eń aldymen pirotehnikalyq ónimderdi satyp alǵanda, oramnyń tutastyǵyna jáne onyń jaramdylyq merzimine nazar aýdaryńyz. 14 jasqa deiingi balalarǵa pirotehnikany óz betimen qoldanýǵa jol bermeńiz. Pirotehnikany qoldaný kezinde ónimdi ózińizden alystaý ustańyz. Qaýipti aimaq radiýsynda (50 metr) pirotehnikany ushyrýǵa eshqandai kedergi (aǵash shoqtary, syzyqtar, otshashýlar baǵytyn ózgerte alatyn elektr jelileri) joq ekenine kóz jetkizińiz. Shyrshalar men olardyń áshekeilerin ornatý kezinde aǵashtar ornyqty negizge ornatylyp, úi-jaidan shyǵýǵa tosqaýyl bolmaýy kerek, shyrshanyń butaqtary qabyrǵa men tóbeden kem degende 1 metr qashyqtyqta ornalasýy qajet, transformatorsyz elektr jelisin paidalanǵan kezde kerneýi 12 voltke deiingi shamdardy qoldanyńyz.
Shamdardyń ruqsat etilgen qýaty 25 vattan aspaýy kerek. Eger jaryqtandyrý kezinde aqaý anyqtalsa (symdardyń qyzýy nemese ushqyn shyǵarý), onda girliandyny dereý elektr jelisinen ajyratyńyz. Zaqymdanǵan nemese qorǵanysh qasietterin joǵaltqan, órt týdyrýy múmkin jaramsyz elektr jelilerin paidalanbańyz», - dedi E.Álibekov.
Onyń aitýynsha, jasandy jáne tabiǵi shyrshanyń ekeýi de órtenetin materialǵa jatady.
«Sondyqtan sanitarlyq normalar men erejege sáikes olardy ornatýdyń talaptary men qaýipsizdigin ǵana eskerý kerek», - dedi ol.
Almaty Jedel meditsinalyq járdem qyzmetiniń bas dárigeri Birjan Ospanovtyń aitýynsha, jańa jyl merekesinde kóbinese adamdar aýrýhanaǵa kúiikpen, synyqpen, ýlanýmen túsedi.
«Byltyr mysaly bizde eń jas kishi patsient 4 jasta boldy. Ul bala bengal ottarynan kózi kúiik shalyp tústi. Der kezinde aýrýhanaǵa jetkizip, emdedik. Qalada mereke kúnderi 200 brigada, 600 meditsina qyzmetkeri jumys isteidi. Eger oqys jaǵdai bolsa, mindetti túrde jedel járdem shaqyryńyzdar», - dedi B.Ospanov.
