Almaty qalasynyń 44 jastaǵy turǵyny 14 balanyń anasy atandy. Bul týraly Qoǵamdyq densaýlyq basqarmasynyń baspasóz qyzmetinen málim etti, dep habarlaidy QazAqparat.
Kópbalaly ana sábiin Almaty qalalyq Perinataldy ortalyǵynda bosandy. 7 ul men 7 qyzdyń anasy dárigerlerge alǵysyn bildirdi.
«Qudaidyń bergenin qýana qabyldaimyz, árine. Sondyqtan, úlken otbasy bolyp otyrmyz. Qazir tuńǵyshymnyń ózi áke atanýǵa daiyndalyp júr. Ne bolsa da, bastysy basymyz aman bolsyn» — dedi qala turǵyny Elena Borodiýk.
Batyr anany bosandyryp alǵan dárigerlerdiń aitýynsha, náresteniń boiy 55 sm, salmaǵy 4 keliden astam. Qazir ananyń da, balanyń da densaýlyǵy birqalypty.
«Joǵarǵy toptaǵy qaýip-qaterdegi qan ketý bolǵandyqtan, búkil ujym bolyp atsalysyp, áiel on tórtinshi balasyn aman-esen bosandy. Salmaǵy 4 keliden asatyn qyz bala dúniege keldi» — dedi Almaty qalalyq Perinataldyq ortalyǵy bas dárigeriniń orynbasary Jámilia Isaeva.
