الماتى قالاسىنىڭ 44 جاستاعى تۇرعىنى 14 بالانىڭ اناسى اتاندى. بۇل تۋرالى قوعامدىق دەنساۋلىق باسقارماسىنىڭ باسپاسٶز قىزمەتٸنەن مەلٸم ەتتٸ, دەپ حابارلايدى قازاقپارات.
كٶپبالالى انا سەبيٸن الماتى قالالىق پەريناتالدى ورتالىعىندا بوساندى. 7 ۇل مەن 7 قىزدىڭ اناسى دەرٸگەرلەرگە العىسىن بٸلدٸردٸ.
«قۇدايدىڭ بەرگەنٸن قۋانا قابىلدايمىز, ەرينە. سوندىقتان, ٷلكەن وتباسى بولىپ وتىرمىز. قازٸر تۇڭعىشىمنىڭ ٶزٸ ەكە اتانۋعا دايىندالىپ جٷر. نە بولسا دا, باستىسى باسىمىز امان بولسىن» — دەدٸ قالا تۇرعىنى ەلەنا بوروديۋك.
باتىر انانى بوساندىرىپ العان دەرٸگەرلەردٸڭ ايتۋىنشا, نەرەستەنٸڭ بويى 55 سم, سالماعى 4 كەلٸدەن استام. قازٸر انانىڭ دا, بالانىڭ دا دەنساۋلىعى بٸرقالىپتى.
«جوعارعى توپتاعى قاۋٸپ-قاتەردەگٸ قان كەتۋ بولعاندىقتان, بٷكٸل ۇجىم بولىپ اتسالىسىپ, ەيەل ون تٶرتٸنشٸ بالاسىن امان-ەسەن بوساندى. سالماعى 4 كەلٸدەن اساتىن قىز بالا دٷنيەگە كەلدٸ» — دەدٸ الماتى قالالىق پەريناتالدىق ورتالىعى باس دەرٸگەرٸنٸڭ ورىنباسارى جەميليا يساەۆا.
