Qala ákimi Baqytjan Saǵyntaev jumys sapary barysynda jańa meditsinalyq ortalyqtyń qurylysynda boldy, sondai-aq velosiped mektebi men «Aqbulaq» yqshamaýdanyndaǵy jaiaý júrginshiler aimaǵynyń jobalarymen tanysty, dep habarlaidy "Ult aqparat".
Almaty ákimi Baqytjan Saǵyntaev Instagram -daǵy paraqshasynda Alataý aýdanyna qarasty «Nurkent» yqshamaýdanyndaǵy bolashaq meditsinalyq ortalyqtyń qurylys alańynda bolǵanyn jazdy.
Elbasynyń tapsyrmasymen qurylysy bastalǵan ortalyq juqpaly aýrýlarǵa qarsy kúreste meditsina ǵylymy men tájiribesin biriktirýge baǵyttalǵan. Jospar boiynsha 380 tósek-orynǵa arnalǵan ortalyq, sonyń ishinde 30 reanimatsiiasy bar, 18 aida boi kóteredi.
Sondai-aq, Baqytjan Saǵyntaev «Almaty Arena» sport kesheninde ashylǵan velomekteptiń jobasymen tanysty.
«Velosport federatsiiasynyń prezidenti N. Smaǵulovtyń qoldaýymen 12-16 jas aralyǵyndaǵy olimpiada rezerv mamandyrylǵan balalar men jasóspirimder sport mektebi tárbielenýshileri velosportpen kásibi túrde shuǵyldanýǵa múmkindik aldy. Óz kezeginde bizge sport keshenderiniń áleýetin tiimdi paidalaný qajet. Sondyqtan sportpen, sonyń ishinde qysqy sport túrlerimen ainalysý úshin infraqurylymdy keńeitýge mán bermekpiz», - dep jazdy megapolis ákimi.
Almaty ákimi «Aqbulaq» aqshamaýdanynda jaiaý júrginshiler aimaǵy salynatynyn jetkizdi.
«Turǵyndardyń saýaldaryna jaýap bere otyryp, «Aqbulaq» yqshamaýdany Ahanov kóshesindegi jaiaý júrginshiler aimaǵyn salý jobasyn ázirledik. Jańa promenadty dáliz qoǵamdyq keńistikti kórkeitip, aýdannyń kórikti mekenine ainalady», - dep atap ótti Baqytjan Saǵyntaev.
